ریاست مغربی بنگال میں جاری سیاسی بیان بازی کے درمیان ریاستی وزیر تعلیم پارتھو چٹرجی نے ایک بار پھر گورنر جگدیپ دھنکر پر تنقید کی ہے۔
انہوں نے کہا کہ گورنر ریاست کا سربراہ ہوتا ہے، ریاست میں سب سے زیادہ عزت ان کی ہی ہوتی ہے۔
وزیر تعلیم کا کہنا ہے کہ بنگال کے موجودہ گورنر ہر معاملے پر بیان بازی کرتے ہیں، اس سے ان کو ہی نقصان ہوسکتا ہے۔
پارتھو چٹرجی کے مطابق گورنر کو منیش شکلا قتل معاملے سے متعلق بیان بازی نہیں کرنی چاہیے تھی۔
ترنمول کانگریس کے جنرل سکریٹری پارتھو چٹرجی نے مزید کہا کہ گذشتہ روز بی جے پی کی ریلی کے دوران جو کچھ بھی ہوا وہ سب کے سامنے ہے۔
انہوں نے کہا کہ بی جے پی کے حامی ریلی کے دوران ہتھیار لائے تھے جبکہ سرعام ہتھیار لے کر گھومنے والوں کے خلاف کارروائی نہیں کی گئی، اس لیے اس پر کسی کو سیاست کرنے کی کیا ضرورت ہے۔
انہوں نے کہا کہ الزام تراشی سے کچھ ہونے والا نہیں ہے، پولیس دائرے میں رہ کر کارروائی کررہی ہے۔
وزیر تعلیم نے کہا کہ سیاسی بیان بازی سے کوئی فائدہ ہونے والا نہیں ہے۔
