مغربی بنگال کی حکومت نے طوفان سے متاثرہ علاقوں میں امدادی سرگرمیاں شروع کردی ہیں اور اس سلسلے میں آج وزیراعلیٰ ممتا بنرجی کا ہوائی سروے کرنے کا بھی امکان ہے۔
سرکاری رپورٹز کے مطابق شمالی 24 پرگنہ ضلع میں پانچ افراد ہلاک ہوگئے اور یہ ہلاکت خیز طوفان اس کے بعد پڑوسی ملک بنگلہ دیش سے ٹکرایا جس میں کم از کم 8 افراد ہلاک اور 15 زخمی ہوگئے۔
دریں اثنا، وزیراعظم نریندر مودی اور مرکزی وزیر داخلہ امت شاہ نے ممتا بنرجی سے بات کی اور مرکز سے ہر ممکن مدد کی یقین دہانی کرائی۔
وہیں ریاست اڑیشہ میں طوفان 'بلبل' کی وجہ سے تیز بارش اور تیز رفتار ہوائیں چلنے کی وجہ سے دو افراد ہلاک ہوگئے۔
دونوں ممالک نے متاثر جنوبی ساحلی علاقوں میں ایمرجنسی نافذ کردی ہے، ریسکیو اداروں نے امدادی کاموں کا آغاز کردیا ہے، محکمہ موسمیات کا کہنا ہے کہ آج شام تک طوفان کی شدت میں کمی آنے کا امکان ہے۔ انہوں نے آگاہ کیا ہے کہ عام لوگ بلاضرورت گھروں سے باہر نکلنے سے اجتناب کریں اور میونسپل اداروں کی ہدایات پر پوری طرح عمل کریں۔
