مغربی بنگال میں ایس ایس سی کے ذریعہ اسکولوں میں اساتذہ کی تقرریوں میں بدعنوانی کے انکشافات اور وزیر پارتھو چٹرجی کی گرفتاری کے بعد سی پی آئی ایم نے ریاستی سطح پر حکمراں جماعت ترنمول کانگریس کے خلاف تحریک شروع کر دی ہے۔ ریاست کے بیشتر اضلاع کولکاتا، شمالی 24 برگنہ، جنوبی 24 پرگنہ، ندیا، مرشدآباد، مالدہ، بیربھوم سمیت دیگر علاقوں میں حکمراں جماعت ترنمول کانگریس کے رہنماؤں کے بدعنوانی میں ملوث پائے جانے کے بعد تحریک شروع کی گئی ہے۔
شمالی 24 پرگنہ کے بیرکپور سب ڈویژن میں سی پی آئی ایم کی مختلف علاقائی کمیٹیوں کی جانب سے وزیر پارتھو چٹرجی اور ان کی حکمراں جماعت ترنمول کانگریس کے خلاف احتجاجی ریلیوں کا اہتمام کیا گیا۔ کھردہ میں حکمراں جماعت ترنمول کانگریس اور بدعنوانی کے الزام میں گرفتار پارتھو چٹرجی کی گرفتاری پر احتجاجی جلوس نکالنے کا اور پتلا نذر آتش کرنے پر سی پی آئی ایم کے پانچ رہنماؤں کو حراست میں لے لیا گیا۔
یہ بھی پڑھیں: Bengal Ssc Scam: ای ڈی، ایس ایس سی تقرری معاملے میں بدعنوانی کی جانچ کرسکتی ہے
دوسری جانب سی پی آئی ایم کے جنرل سیکرٹری محمد سلیم نے کہا کہ حکمراں جماعت ترنمول کانگریس کے بیشتر رہنما بدعنوانی میں ملوث ہیں۔ ان کے جیل جانے کا سلسلہ شروع ہو چکا ہے۔ عوام کو بدعنوانی میں ملوث حکومت ہرگز نہیں چائیے۔ سی پی آئی ایم کے ریاستی جنرل سیکرٹری محمد سلیم کا کہنا ہے کہ پنجایت انتخابات سے ترنمول کانگریس کی حکومت کے خاتمے کا سلسلہ شروع ہوگا۔ اس کے لئے عوام کو اپنے ووٹوں کا بالکل درست استعمال کرنا ہوگا۔
