اطلاعات کے مطابق ایک 55 سالہ شخص جو کورونا وائرس مثبت پایا گیا تھا، کل رات ٹرینی ہاسپٹل لایا جارہا تھا۔ یہ شخص رات 9 بجے کے قریب ایمبولینس سے فرار ہوگیا۔
ایمبولینس ڈرائیور کے مطابق اس شخص نے ضروری حاجت پوری کرنے کے لیے گاڑی روکنے کو کہا اس کے بعد وہ شخص قریبی جنگل میں گیا۔
تاہم تھوڑی دیر بعد ایمبولینس ڈرائیور کو معلوم ہوا کہ وہ شخص بھاگ گیا ہے۔ ڈرائیور نے جنگل میں اس شخص کی تلاش کی لیکن وہ فرار ہوگیا تھا، اس کے بعد ڈرائیور نے اس واقعے کے بارے میں جوربنگلہ پولیس کو آگاہ کیا۔
جس کے فوراً بعد پولیس اور جنگلات کے اہلکار موقع پر پہنچ گئے لیکن اس شخص کا پتہ لگانے میں ناکام رہے۔
بعد میں یہ بات سامنے آئی کہ یہ شخص حال ہی میں پیرول پر جیل سے باہر آیا تھا۔
پولیس کے مطابق کورونا وائرس سے متاثرہ شخص پر اپنی بیوی کے قتل کا الزام ہے۔ ایک عدالت نے اسے ایک ہفتہ قبل ایک ماہ کے لیے پیرول کی منظوری دی تھی جس کے بعد اس کی کووڈ 19 رپورٹ مثبت آئی تھی۔
