مغر بی بنگال میں عام لوگوں کے ذریعے قانون کی خلاف ورزی کا معاملہ بڑھ رہا ہے۔ پولیس انتظامیہ پراعتماد کرنے کے بجائے لوگ خود ہی فیصلہ کرنے لگے ہیں۔
ایسا ہی ایک واقعہ جنوبی کولکاتا کے ٹالی گنج پولیس اسٹیشن میں پیش آیا جب ایک ملزم کو چھڑانے کے لیے خواتین نے آن ڈیوٹی پولیس افسر پر حملہ کردیا۔ خواتین نے آن ڈیوٹی افسر پر حملہ کرتے ہوئے ان کی وردی بھی پھاڑ دی۔
موصولہ اطلاع کے مطابق ٹالی گنج تھانے کی پولیس ناکہ چیکنگ کے دوران ایک شخص کو نشے کی حالت موٹر سائیکل چلانے کے الزام میں پکڑ کر تھانے لے گئی۔
اس کے بعد ملزم کے رشتہ دار اسے چھڑانے کے لیے تھانے کے باہر جمع ہو گئے۔ ان میں چند خواتین نے تھانے میں داخل ہو کر ہنگامہ کرنا شروع کر دیا۔ اس دوران انہوں نے آن ڈیوٹی افسر پر حملہ کردیا اور ان کی وردی پھاڑدی۔
پولیس کا کہنا ہے کہ ناکہ چیکنگ کے دوران رنجیت ہلدار نام کے ایک شخص کو نشے کی حالت میں موٹرسائیکل چلانے کے الزام میں پکڑا گیاتھا۔ ان پر ٹریفک کی خلاف ورزی کا الزام تھا۔
انہوں نے کہاکہ ان کے رشتہ داروں نے تھانے میں داخل ہوکر ہنگامہ کیا اور آن ڈیوٹی افسران کے ساتھ مار پیٹ بھی کی ۔ آن ڈیوٹی افسران پر حملے کرنے کے الزام میں چند خواتین کو حراست میں لیا گیا تھا لیکن انہیں بعد میں چھوڑ دیا گیا۔
خواتین کاکہنا ہے کہ ٹالی گنج تھانے کی پولیس ہمارے ساتھ بدسلوکی کی ۔ہم نے جب اس کی مخالفت کی تو انہوں نے لاٹھی سے حملہ کرکے تھانے سے نکالنے کی کوشش کی ۔اس پر بات بگڑی اور نوعبت مار پیٹ تک پہنچ گئی۔
