کیلاش وجے ورگیہ نے متھن چکرورتی سے ملاقات کی

مغربی بنگال اسمبلی الیکشن میں بی جے پی پوری طاقت لگا رہی ہے۔ اسی درمیان بنگال کے بی جے پی انچارج کیلاش وجے ورگیہ نے معروف اداکار متھن چکرورتی سے ملاقات کی۔ ملاقات کے بعد قیاس آرائیاں ہو رہی ہیں کہ متھن دا آج وزیر اعظم مودی کی ریلی میں شرکت کریں گے اور یہ بھی قیاس آرائی ہے کہ متھن چکرورتی جلد ہی بی جے پی میں شامل ہو سکتے ہیں۔

مغربی بنگال کے بی جے پی انچارج کیلاش وجے ورگیہ نے اداکار متھن چکرورتی سے کولکاتا میں ملاقات کی ہے۔ اس بات کی جانکاری کیلاش وجے ورگیہ نے ٹویٹ کر دی ہے۔

انہوں نے ٹویٹ کر لکھا کہ 'ابھی دیر رات کولکاتا کے بیلگاچیا میں سنیما کی دنیا کے مشہور اداکار متھن دا کے ساتھ لمبی گفتگو ہوئی۔'

انہوں نے لکھا کہ 'ان کی حب الوطنی اور غرباء کے تئیں پیار کی کہانیاں سن کر دل خوش ہو گیا۔'

اداکار متھن کے بی جے پی میں شامل ہونے کی قیاس آرائیوں پر وجے ورگیہ نے پہلے کہا تھا کہ میں نے ان سے ( متھن) ٹیلیفون پر بات کی ہے۔ وہ آج آنے والے ہیں۔ میں ان کے ساتھ لمبی بات چیت کے بعد ہی کوئی تبصرہ کروں گا۔

وزیر اعظم مودی آج کولکاتا کے بریگیڈ گراؤنڈ میں ریلی سے خطاب کریں گے۔ ان قیاس آرائیوں کے درمیان متھن چکرورتی وزیر اعظم کی ریلی میں شامل ہو سکتے ہیں۔

غور طلب ہے کہ 294 اسمبلی سیٹوں کے لیے 27 مارچ سے انتخابات شروع ہو رہے ہیں۔ ریاست میں اس سال آٹھ مراحل میں انتخابات ہونے ہیں جبکہ دو مئی کو نتائج آئیں گے۔