بہار میں ہونے والے اسمبلی انتخابات کے پیش نظر بنگال میں بھی سیاسی سرگرمیاں عروج پر ہے۔
گذشتہ پارلیمانی انتخابات میں بنگال کی 42 سیٹوں میں سے 18 سیٹوں پر تاریخی کامیابی حاصل کرنے والی بی جے پی سابقہ کارنامے کو دوہرانے کے لئے پر عزم ہے.
بی جے پی کو یہ بات اچھی طرح سے معلوم ہے کہ آئندہ اسمبلی انتخابات میں سابقہ تاریخی کارنامے کو دوہرانے کے لئے مسلمانوں کے ووٹ کتنے اہم ثابت ہوں گے.
اس تعلق سے مرشد آباد ضلع بی جے پی کے صدر گوری شنکر نے کہا کہ 'مرشدآباد میں مسلمان بڑی تعداد میں رہتے ہیں. ان کے ووٹوں سے جیت اور ہار کا فیصلہ ہوتا ہے.
انہوں نے کہا کہ مسلمانوں کے ووٹ اہم ہیں انہیں کسی بھی قیمت پر نظرانداز نہیں کیا جا سکتا ہے، ہماری پارٹی مسلمانوں کے ووٹ حاصل کرنے کے لئے پر عزم ہے. بنگال کے اقلیتی طبقے کو کانگریس, سی پی ایم اور ترنمول کانگریس سے کیا ملا ہے. ہمارے پاس ان کے لئے ترقیاتی منصوبے ہیں۔
بی جے پی کے رہنما نے کہا کہ 'ضلع میں ہمیں کامیابی ملتی ہے تو لوگوں کے لئے بہت کچھ کرنے کا منصوبہ ہے، ضلع کے لوگوں کی معاشی حالت کو مستحکم کرنا ہمارا اولین مقصد ہوگا.
