لاک ڈاؤن کے مدنظر بینک ملازمین کی تنظیم نے مشرقی ریلوے افسران کو خط لکھ کر اسپیشل لوکل ٹرین میں سفر کرنے کی اجازت مانگی ہے۔ معلوم ہوکہ مغربی بنگال میں 30 مئی تک لاک ڈاؤن نافذ ہے۔
دوسری طرف لاک ڈاؤن کے سبب لوکل ٹرین اور میٹرو خدمات پہلے ہی معطل ہے۔ مغربی بنگال کی بینک ملازمین کی تنظیم نے ریلوے اور صحت ملازمین کی طرح بینک ملازمین کو بھی اسپیشل لوکل ٹرین میں سفر کرنے کی اجازت مانگی ہے۔
بینک تنظیم کا کہنا ہے کہ بینکوں کے ملازمین کو صبح 10 بجے سے لے کر دوپہر دو بجے تک کام کرنا پڑتا ہے، اضلاع سے بینک ملازمین بڑی مشکل سے کولکاتا پہنچتے ہیں۔
انہوں نے کہا کہ بینک کے ملازمین کو بھی اگر اسپیشل ٹرینوں میں سفر کرنے کی اجازت مل جاتی ہے تو اس سے ان کی پریشانیاں دور ہو جائے گی۔
واضح رہے کہ گزشتہ چھ مئی کو کورونا وائرس کے بڑھتے ہوئے کیسز کے مدنظر ریاستی حکومت نے لوکل ٹرین خدمات معطل کر دی تھی۔
مشرقی ریلوے نے اپنے ملازمین کے لئے اسپیشل ٹرین چلانے کا اعلان کیا ہے۔ اس کے بعد ڈاکٹرز، نرسوں سمیت صحت مراکز میں کام کرنے والے ملازمین کو بھی اسپیشل ٹرین سے سفر کرنے کی اجازت دی گئی ہے۔
