مغربی بنگال کے دارالحکومت کولکاتا کے جنوبی شہر علی پور سے یوتھ رہنما پامیلا گوسوامی کی منشیات معاملے میں گرفتاری کے بعد حکمراں جماعت ترنمول کانگریس سمیت تمام دیگر پارٹیاں بی جے پی کو گھیرنے میں مصروف ہے۔
حکمراں جماعت ترنمول کانگریس کے رہنما اور ریاستی وزیر جاوید احمد خان نے کہا کہ پامیلا گوسوامی کو گرفتار کرنے پر پولیس کو مبارکباد پیش کرنا چاہئے۔ انہوں نے کہا کہ پولیس نے واقعی شاندار کارنامہ انجام دیا ہے۔ انہوں نے کہا کہ بی جے پی کی رکن پارلیمان سمترا خان کو چاہئے کہ وہ بھی پولیس کی کارکردگی کی تعریف کرے جبکہ وہ غیرضروری ترنمول کانگریس پر الزامات عائد کر رہی ہیں۔
جاوید احمد خان نے کہا کہ پامیلا گوسوامی نے مجسٹریٹ کے سامنے اقبال جرم کرلیا ہے اور تفتیش کے دوران کیلاش وجے ورگیہ کے قریبی راجیش سنگھ سمیت بی جے پی کے کئی رہنماوں کا نام بھی لیا ہے۔ انہوں نے کہا کہ رکن پارلیمان سمترا خان کو ترنمول کانگریس پر تنقید کرنے سے پرہیز کرنا چاہئے۔
غور طلب ہے کہ بی جے پی کے رکن پارلیمان سمترا خان نے پامیلا گوسوامی کی گرفتاری کو ترنمول کانگریس کی سازش قرار دیا تھا۔ انہوں نے کہا کہ ترنمول کانگریس کے اشارے پر بی جے پی کی یوتھ رہنما کو جھوٹے الزام میں پھنسایا گیا ہے۔ واضح رہے کہ گزشتہ روز جنوبی کولکاتا کے علی پور سے پولیس نے بی جے پی کی یوتھ رہنما پامیلا گوسوامی کو کوکین سمیت گرفتار کیا تھا۔
