درگاپور: منی پور میں دو خواتین پر وحشیانہ تشدد کے ویڈیو کی ملک بھر میں مذمت کی جا رہی ہے۔ ادھر مغربی بنگال کے مغربی بردوان میں دو قبائلی خواتین پر بہیمانہ مظالم کا ویڈیو منظر عام پر آیا ہے۔ جانکاری کے مطابق ان خواتین کو چڑیل ڈائن قرار دے کر انہیں تشدد کا نشانہ بنایا گیا۔ اس معاملے میں ایک بوڑھی خاتون جس کی عمر 60 سال بتائی جاتی ہے اور اس کی بیٹی پر تشدد کیا گیا۔ الزام ہے کہ ان دونوں خواتین کو زبردستی پیشاب پاخانہ کھانے پر مجبور کیا گیا۔ بھارت جکات ماجھی پرگنہ محل کی مدد سے یہ خاتون جمعرات کو انصاف کی فریاد کرنے کے لیے فرید پور تھانے پہنچی۔ پولیس نے اس معاملے میں قانونی کارروائی کرنے کی یقین دہانی کرائی ہے۔
جادو ٹونے کے الزام میں تشدد
پولیس تھانے میں درج کرائی گئی شکایت کے مطابق درگاپور کے فرید پور تھانہ علاقے کی رہنے والی سرسوتی باوری کو علاقے میں گنین کے نام سے جانا جاتا ہے۔ انہوں نے تھانہ انڈال کے قبائلی علاقے کے کچھ لوگوں کو بتایا کہ ان کے گاؤں میں ایک 'چڑیل' ہے۔ اس کے بعد 60 سالہ قبائلی خاتون اور اس کی بیٹی کو چڑیل بتا کر انہیں تشدد کا نشانہ بنایا۔
ماں بیٹی پر وحشیانہ تشدد
عمر رسیدہ خاتون نے الزام لگایا کہ اس کے سر کے بال اور بدن کی کھال کو بلیڈ سے کاٹنے کے بعد اسے پیٹ کے بل لٹا دیا گیا، اس کی ناک پکڑی گئی اور انہیں پیشاب پاخانہ کھلایا گیا۔ بات یہیں ختم نہیں ہوئی۔ تشدد کرنے والوں نے انہیں نیم برہنہ کر کے زہریلے کانٹوں پر بیٹھنے پر مجبور کیا۔ مبینہ طور پر انہیں وحشیانہ جسمانی اور ذہنی تشدد کا نشانہ بنانے کے بعد ان سے 20 ہزار روپے لیے گئے اور انہیں گاؤں سے باہر نکال دیا گیا۔
انڈال پولیس اسٹیشن میں شکایت
اس واقعہ کا علم ہونے کے بعد قبیلے کی ایک تنظیم بھارت جکات پرگنہ محل کے ذمہ دار نے دونوں خواتین کو بچایا۔ جمعرات کو جب خاتون اور اس کی بیٹی پہلی بار فرید پور تھانے میں شکایت درج کرانے گئی تو پولس نے کہا کہ چونکہ وہ انڈال تھانے میں رہتی ہیں، اس لیے وہیں شکایت درج کرائیں۔ قبائلی خاتون نے درگاپور فرید پور بلاک کے بی ڈی او سے تحریری شکایت درج کرائی اور انڈال پولیس اسٹیشن میں شکایت درج کروائی۔ معمر خاتون نے اپنی آپ بیتی بتاتے ہوئے کہا کہ انہوں نے ہمیں ڈائن کہا اور مجھے اور میری بیٹی کو مارا۔ اوپر ہمیں زبردستی پاخانہ کھلایا گیا۔ انہوں نے مجھے مارا یہاں تک کہ میں بیہوش ہو گئی۔ مجھ سے 20 ہزار روپے چھین لیے۔ میں چاہتی ہوں کہ انہیں سخت سزا ملے۔
