کانگریس کے پارلیمانی لیڈر ادھیر چودھری کو دو سال کے بعد ایک بار پھر سے مغربی بنگال پردیس کانگریس کی ذمہ داری سونپی گئی ہے۔اب قومی و ریاستی سطح پر ادھیر چودھری اپنی ذمہ داری نبھائیں گے۔
دو سال قبل ادھیر چودھری کو مغربی بنگال پردیس کانگریس کی ذمہ داری گنوانی پڑی تھی۔اس دوران پردیس کانگریس کی ذمہ داری سومن مترا کو دی گئی تھی۔لیکن اس درمیان ریاست میں کانگریس کی حالت میں کوئی بہتری نہیں آئی تھی۔سومن مترا کی موت کے بعد سے پردیس کانگریس کے صدر کون بنے گا اس کو لیکر تمام قیاس آرائیاں جاری تھیں۔اب یہ ذمہ داری ایک بار پھر سے بہرام پور کے ایم پی ادھیر رنجن چودھری کو مل گئی ہے۔
امید کی جا رہی ہے کہ ایک بار پھر سے پردیس کانگریس کی ترنمول مخالف سیاست میں جان پڑنے والی ہے۔سومن مترا کو جب پردیس کانگریس کا صدر بنایا گیا تھا تو انہوں نے واضح کر دیا تھا کہ وہ ترنمول کانگریس کے تئیں سخت گیر رویہ نہیں اختیار کریں گے۔لیکن ادھیر چودھری سخت ترنمول مخالف کے طور پر مقبول ہیں۔ آئندہ سال ریاستی اسمبلی کے انتخابات ہونے والے ہیں۔ترنمول کانگریس اور بی جے پی کے درمیان کانگریس کو اپنے وجود کی لڑائی کرنی ہے۔وہیں بایاں محاذ کے ساتھ ملکر لڑائی لڑنے کی ذمہ داری ہے۔
مغربی بنگال میں ممتا بنرجی کی پکڑ ابھی مضبوط ہے لیکن اس کے باوجود مودی اور شاہ نے ممتا بنرجی کے لئے مشکلیں کھڑی کردی ہے۔آئندہ سال ہونے والے ریاستی انتخابات کے مد نظر ہی کانگریس اعلی قیادت نے ادھیر چودھری کو اس کام کے لئے منتخب کیا ہے۔
