مغربی بنگال میں ان دنوں تہوار کا موسم ہے لیکن کورونا وائرس کے تیزی سے پھیلنے سے مریضوں کی تعداد میں اضافہ ہونے کا سلسلہ جاری ہے۔
کولکاتا پولیس اور مغربی بنگال پولیس نے پہلے ہی تہوار کے دوران گائڈ لائن کی خلاف ورزی کرنے اور ماسک کا استعمال نہیں کرنے پر سخت کارروائی کا حکم دے رکھا ہے۔
کولکاتا پولیس نے گائڈ لائن کی خلاف ورزی کرنے والوں پر کارروائی کرتے ہوئے سینکڑوں افراد کو گرفتار کیا ہے۔
گرفتار ہونے والوں میں خواتین بھی شامل ہیں۔ لڑکے اور لڑکیوں کو سخت ہدایت دے کر چھوڑ دیا گیا ہے۔
پولیس ذرائع کا کہنا ہے کہ کولکاتا اور اس کے اطراف میں تہوار کے دوران پولیس کی سخت کارروائی جاری رہے گی۔
اس دوران سڑکوں پر تھوکنے والے 68 لوگوں کو حراست میں لیا گیا۔ 12 افراد کو بھیڑ لگا کر کھڑے ہونے کے الزام میں گرفتار کیا گیا ہے۔
پولیس کی کارروائی کے دوران درجنوں گاڑیاں ضبط کی گئی ہیں۔
کولکاتا کمشنر انوج شرما کا کہنا ہے کہ درگا پوجا مغربی بنگال کا سب سے اہم اور بڑا تہوار ہے لیکن موجودہ حالات میں لاپروائی برتنے کا مطلب آفت کو دعوت دینا ہے۔
انہوں نے کہا کہ حکومتی گائڈ لائن کی خلاف ورزی کرنے اور ماسک کا استعمال نہیں کرنے والوں کے خلاف سخت کارروائی کی جائے گی۔
واضح رہے کہ طبی ماہرین پوجا سے قبل تہواروں کے دوران کورونا کے پھیلنے کا خدشہ ظاہر کیا تھا۔
دوسری طرف کلکتہ ہائی کورٹ نے کورونا کے مدنظر پوجا پنڈالوں میں عام لوگوں کے داخلے پر پابندی عائد کرنے کا حکم دے دیا ہے۔
