محمد ثناء اللہ کے لیے آواز بلند

ریاست اتراکھنڈ میں کانگریسی رہنماؤں نے ہلدوانی مجسٹریٹ کے ذریعہ بھارت کے صدر کو ایک میمورنڈم بھیجا تاکہ بھارت کے بہادر سپاہی محمد ثناء اللہ کو انصاف دلایا جا سکے۔

بتا دیں کہ کانگریسی کارکنان نے بھارتی فوج کے جوان اور کارگل کے لیے لڑنے والے بہادر فوجی محمد ثناء اللہ کے لیے آواز اٹھائی اور مطالبہ کیا کہ ان کو انصاف دیا جائے۔

میمورنڈم پیش کرنے والے کانگریسی رہنماؤں نے کہا کہ 'بی جے پی حکومت این آر سی اور سی اے اے کے ذریعہ ملک کے لیے قربانی دینے والوں کو درانداز بنا دینے پر آمادہ ہے۔'

کانگریس کے ضلعی وزیر ہیمنت شاہو نے کہا کہ 'بھارتی فوج کے بہادر سپاہی محمد ثناء اللہ نے پاکستان کے خلاف کارگل کی جنگ لڑی تھی، حکومت نے ان کی این آر سی کے ذریعے شہریت چھین لی۔'

انہوں نے کہا کہ 'ملک کے لیے لڑنے والے بہادر سپاہی محمد ثناء اللہ کی شہریت چھین لی گئی اور ایک پاکستانی نژاد گلوکار عدنان سمیع کو پدم شری دیا گیا جو کہ انتہائی شرمناک ہے۔'