ہندو ہی ملک کی سرکار بناتا اور گراتا ہے: سکریٹری مسلم پرسنل لا بورڈ

اترپردیش کے ضلع بریلی میں سنیچر کے روز صحافیوں سے روبرو ہوتے ہوئے آل انڈیا مسلم پرسنل لا بورڈ کے سکریٹری ظفریاب جیلانی نے کہا کہ، 'ہندو ہی ملک کی سرکار گراتا ہے اور بناتا ہے۔ آج کے اس دور میں ہندو اتنا پریشان ہوگیا ہے کہ ریاست میں آئندہ اسمبلی انتخابات میں نتائج سب کے سامنے ہوں گے۔'

ظفریاب جیلانی نے کہا کہ، 'کانگریس پارٹی نے ہمیشہ مسلمانوں کے ساتھ دھوکہ کیا، جس کا نتیجہ ہے کہ کانگریس کا سارا ووٹ بینک کھسک گیا۔ انہوں نے کہا کہ آج جو ملک کے حالات ہیں، اس سے برے حالات اندرا گاندھی کے ایمرجنسی کے دور میں تھا۔'

انہوں نے سماجوادی پارٹی کے سابق قومی صدر ملائم سنگھ یادو کی تعریف کرتے ہوئے کہا کہ، 'بابری مسجد کا معاملہ جب عدالت میں چل رہا تھا تب سبھی اسے متنازع زمین کہتے تھے، لیکن ملائم سنگھ یادو نے بابری مسجد ہی کہا۔'

طفریاب جیلانی نے کہا کہ، 'آج کے دور میں مسلمان خود کو آئین اور شریعت کو سامنے رکھ کر یہ سوچے کہ میں ہندوستانی ہوں، تو اس کا ٹکراؤ کبھی کسی سے نہیں ہوگا۔'

سی اے اے اور این آر سی پر انہوں نے کہا کہ، 'مسلمانوں کو جب لگا کہ انہیں ملک سے باہر کر دیا جائے گا تو مسلمان سی اے اے اور این آر سی کی مخالفت میں سڑکوں پر آگئے تھے، لیکن ملک کے 20 کروڑ مسلمانوں کو ملک سے باہر نکالنے کی ہمت کسی میں بھی نہیں ہے۔'