لکھنؤ: شادی و دیگر تقریبات میں شرکا کی قید ختم

اتر پردیش کے محکمۂ داخلہ نے ٹوئٹ کرکے بتایا کہ انتظامیہ نے شادی و دیگر تقریبات کو کھلے مقام پر رقبہ کے مطابق اجازت دے دی ہے۔ اس کے ساتھ ہی ہر جگہ پر کووڈ پروٹوکول پر عمل کرنا ضروری ہوگا۔

لکھنؤ: عالمی وبا کورونا وائرس پر موثر کنٹرول حاصل کرنے کے بعد اترپردیش حکومت نے کھلے میں منعقد کئے جانے والے شادی و دیگر تقریبات میں مہمانوں کی تعداد کے سلسلے میں لگائی پابندی کو ختم کردیا ہے جس کے بعد کھلے علاقے میں کووڈ پروٹوکول پر عمل کرتے ہوئے رقبہ کے حساب سے مہمانوں کو مدعو کیا جاسکے گا۔

اتر پردیش کے محکمۂ داخلہ کے آفیشیل ٹوئٹر ہینڈل سے ٹوئٹ کر کے اس ضمن میں جانکاری دی گئی۔ ٹوئٹ کے مطابق'اترپردیش انتظامیہ نے شادی و دیگر تقریبات کو کھلے مقام پر رقبہ کے مطابق اجازت دے دی ہے۔

اس کے ساتھ ہی ہر جگہ پر کووڈ پروٹوکول پر عمل کرنا ضروری ہوگا۔ اس دوران باب الداخلہ پر کووڈ ہیلپ ڈیسک کا لگایا جانا ضروری ہے۔

قابل ذکر ہے کہ اترپردیش میں کورونا کے ایکٹیو مریضوں کی تعداد 177 رہ گئی ہے۔ 10 کروڑ 39 لاکھ 55 ہزار ویکسین لگاکر اترپردیش کووڈ ٹیکہ کاری میں بھی ملک میں سرفہرست ہے۔ ریاست کے 31 اضلاع میں کورونا وائرس کا ایک بھی مریض نہیں ہے۔

یو این آئی