ریاست اترپردیش کےضلع بہرائچ کے تھانہ موتی پور علاقہ کے تحت نہر کنارے ایک عورت کی لاش مشتبہ حالت میں پائی گئی، جو کافی زخمی حالت میں تھی۔
ملی جانکاری کے مطابق گذشتہ شب 21 سالہ پھول متی یادو بنت اتواری ساکن جوگنیا تھانہ موتی پور کی لاش نہر کے کنارے مشتبہ حالت میں پائی گئی، پھول متی کی شادی تین سال قبل پپو ولد گھراؤ ساکن انبوہ ہسنوا پورہ تھانہ نانپارہ کے ساتھ ہوئی تھی۔
پھول متی کے گھر والوں کے مطابق کل 26 جون اس کے شوہر نے فون کرکے بلایا تھا، اطلاع ملنے پر تھانہ موتی پور پولیس کے ذریعہ پنچنامہ کروا کر پوسٹ مارٹم کروایا جارہا ہے۔
اس واردات کو لے کر پولیس کپتان ڈاکٹر وپن کمار ورما نے بتایا کہ ہلاک ہوئی خاتون کے اہل خانہ کا کہنا ہے کہ پھول متی کو پہلے فون کرکے بلایا گیا اور اس کے بعد اس کا قتل کردیا گیا، لاش کا پوسٹ مارٹم کرایا جارہا ہے۔ پوسٹ مارٹم رپورٹ آنے کے بعد آگے کی کاروائی کی جائے گی۔
