ریواڑی: ہریانہ کے ریواڑی ضلع میں یوپی کی ایک خاتون نے اپنے پڑوسی پر عصمت دری اور زبردستی مذہب تبدیل کرنے کا الزام عائد کیا ہے۔ خاتون کا الزام ہے کہ بہار کے رہنے والے ملزم رحم الدین نے اس کی فحش ویڈیو وائرل کرنے کی دھمکی دے کر رقم اور زیورات چھین لیے۔ تھانہ ویمن پولیس نے ملزم کے خلاف مختلف دفعات کے تحت مقدمہ درج کر کے کارروائی شروع کر دی ہے۔
خاتون کا الزام ہے کہ 5 مئی کو اس کا شوہر ڈیوٹی پر گیا تھا۔ شام کو ملزم رحم الدین گھر آیا اور کہا کہ اس کے پاس جو بھی پیسے اور زیورات ہیں وہ دے دو ورنہ فحش ویڈیو وائرل کر دوں گا۔ خاتون کا کہنا ہے کہ دباؤ میں آکر ملزم کو 8000 روپے نقد، سونے اور چاندی کے زیورات دیے۔ اس کے بعد ملزم نے اسے نشہ آور چیز پلائی۔ جب اسے ہوش آیا تو وہ جے پور کے ایک ہوٹل میں تھی۔ اگلے دن ملزم اسے اجمیر میں درگاہ کے قریب ایک ہوٹل لے گیا اور وہاں بھی اس کی عصمت دری کی۔ خاتون کا الزام ہے کہ ملزم اسے اجمیر درگاہ لے گیا اور زبردستی اسلام قبول کروایا۔ 16 مئی کو ملزم اسے دھروہرہ واپس لے آیا۔
متاثرہ خاتون یوپی کے اعظم گڑھ ضلع کی رہنے والی ہے۔ وہ فی الحال اپنے خاندان کے ساتھ ریواڑی کے دھروہیرا میں رہ رہی تھی۔ متاثرہ نے بتایا کہ اس کے گھر کے سامنے بہار کے سارن ضلع کا رہنے والا رحم الدین اپنی بیوی کے ساتھ کرائے پر رہتا تھا۔ اسی دوران متاثرہ اور رحم الدین کی بیوی ایک دوسرے کے گھر آنے جانے لگیں۔
خاتون کا دعویٰ ہے کہ رحم الدین کے خوف سے وہ اپنے بچوں کو لے کر یوپی کے ایک گاؤں چلی گئی۔ لیکن، ملزم نے وہاں بھی اس کا پیچھا نہیں چھوڑا اور 28 جون کو اس کے گاؤں پہنچ گیا۔ معاملہ سامنے آنے کے بعد گاؤں کے لوگوں نے ملزم کو پکڑ کر پولیس کے حوالے کر دیا۔ ملزم کی دھمکیوں سے پریشان ہو کر خاتون ریواڑی واپس آگئی اور اس کے خلاف خواتین پولیس اسٹیشن میں شکایت درج کرائی۔
آپ کو بتاتے چلیں کہ متاثرہ کے شوہر نے پہلے ہی اس کی گمشدگی کا مقدمہ درج کرایا تھا۔ اس لیے خاتون کو عدالت میں اپنا بیان ریکارڈ کرانا پڑا۔ ایسے میں ملزم نے دھمکی دی کہ اگر عدالت میں جج کے سامنے اس کے خلاف بیان دیا گیا تو وہ خاندان کو تباہ کر دے گا۔ متاثرہ نے الزام لگایا کہ جب وہ دھروہیرا تھانے گئی تو پولیس اہلکار نے اس کے شوہر کے ساتھ مارپیٹ کی۔ اس کے علاوہ عدالت میں رحم الدین کے خلاف کچھ نہ کہنے کا دباؤ بنایا گیا جس کی وجہ سے متاثرہ خاتون نے عدالت میں رحم الدین کے خلاف کوئی بیان نہیں دیا۔
متاثرہ خاتون کی شکایت پر خواتین پولیس اسٹیشن نے ملزم رحم الدین اور اس کی بیوی کے خلاف آئی پی سی کی دفعہ 328، 376(2)(N)، 379A، 452، 506، 34 کے تحت مقدمہ درج کرکے کارروائی شروع کردی ہے۔ جس پولیس افسر کے خلاف الزامات لگائے گئے ہیں اسے بھی بلا کر تفتیش کی جا رہی ہے۔ پورا معاملہ ڈی ایس پی کے سامنے پیش کیا جائے گا۔
