اترپردیش کے مہاراج گنج کے کوٹھی بھار علاقے کے پَٹ کَھولی میں تیسرے دن ہفتے کے روز بھی تیندوے کا خوف ہے۔ ہفتے کی صبح تیندوے نے ایک 22 برس کے شخص پر حملہ کر کے اسے زخمی کر دیا۔ اہل خانہ اسے زخمی حالت میں لے کر سِسوا پی ایچ سی پہنچے، جہاں علاج کے بعد ڈاکٹروں نے اسے گھربھیج دیا۔
تیندوے کے حملے سے گاؤں کے عوام خوفزدہ ہیں۔ وہیں، محکمہ جنگلات کی ٹیم نے پنجرہ لگا کر تیندوے کو پکڑنے کی کوشش کی مگر تیندوا پکڑ میں نہیں آ سکا ہے۔
گیڑہرُوآجنگل سے متصل پَٹ کَھولی میں تیندوے نے دہشت پھیلا دی ہے۔ جمعرات کی صبح کھیسراری کے باشندے 60 سال کے کیدار اور پڑوسی ضلع کشی نگر کے بھیڑی جنگل کے باشندے سُکئی اور گنیش کو تیندوے نے پنجہ مار کر زخمی کر دیا تھا۔ شام کو تیندوے کو پکڑنے پہنچے محکمہ جنگلات کے رینجر سمیت تین اہلکاروں کو بھی تیندوے نے زخمی کر دیا۔
اسی دوران جمعہ کی صبح رفع حاجت کے لیے نکلے پٹکھولی کے باشندے امریش پر تیندوے نے حملہ کر کے اسے زخمی کر دیا۔ لوگوں کا کہنا ہے کہ تیندوے نے تین چار دن پہلے کشی نگر کے کھڈا تھانہ حلقے کے موضع کَھیرا میں خوف زدہ کر دیا ہے۔ اس وقت کا فوٹو اور ویڈیو خوب وائرل ہو رہا ہے۔
