عالمی شہرت یافتہ علی گڑھ مسلم یونیورسٹی کے بانی سرسید احمد خان متعدد صلاحیتوں کے مالک تھے اور سائنس میں ان کی دلچسپی 1864ء میں ان کے ذریعے 'سائنٹفک سوسائٹی' کے قیام سے ظاہر ہوتی ہے۔
اے ایم یو سو سالہ قدیم ادارہ ہے اور یہاں فزکس، ریاضی اور کیمسٹری جیسے شعبہ محمڈن اینگلو اورینٹل کالج (ایم اے او) کے زمانے سے چل رہے ہیں۔ واضح رہے محمڈن اینگلو اورینٹل کالج کا قیام 1877 میں اور علی گڑھ مسلم یونیورسٹی 1920 میں عمل میں آئی۔
علی گڑھ مسلم یونیورسٹی کی فیکلٹی آف سائنس کے سو سال پر ایک کتاب کا اجراء وائس چانسلر پروفیسر طارق منصور نے ایڈمنسٹریٹر بلاک کے سلیکشن کمیٹی روم میں کیا۔
اس موقع پر پروفیسر طارق منصور نے کہا "فیکلٹی آف سائنس نے گذشتہ سو برسوں میں دانشورانہ جستجو، اخلاقیات اور قدروں پر مبنی تعلیم دی ہے۔ آج یہ فیکلٹی بین الاقوامی اہمیت کی حامل متعدد سائنسی کامیابیوں کی گواہ ہے"، پروفیسر طارق منصور نے مزید کہا " کہ طلبہ کو بے شمار مواقع فراہم کئے گئے ہیں اور تعلیمی اداروں کی سائنسی کارکردگی کے جائزے میں ہماری فیکلٹی آف سائنس ملک میں سرفہرست ہے"۔
پروفیسر قاضی مظہر علی (ڈین، فیکلٹی آف سائنس) نے خصوصی گفتگو میں بتایا "علی گڑھ مسلم یونیورسٹی کے قیام کو سو سال مکمل ہو گئے ہیں لیکن اس یونیورسٹی میں کچھ شعبے سو سال سے بھی زیادہ پرانے ہے، یعنی وہ محمڈن اینگلو اورینٹل کالج کے زمانے سے ہیں۔
سرسید احمد خان کی اپنی کوششوں سے محمڈن اینگلو اورینٹل کالج میں ریاضی کی تعلیم شروع ہو گئی تھی اور 1912 تک شعبہ ریاضی، فزکس، کیمسٹری اور بیولوجی نے اپنا کام کرنا شروع کر دیا تھا۔
سر ضیاءالدین جو بعد میں یونیورسٹی کے وائس چانسلر بنے اور ریاضی کی دنیا میں بہت نام کمایا انہوں نے 1895 میں سرسید کی موجودگی محمڈن اینگلو اورینٹل کالج سے بی اے ریاضی کی ڈگری حاصل کر لی تھی۔
پروفیسر قاضی مظہر علی نے بتایا شعبہ فزکس جو فیکلٹی آف سائنس کے تحت قائم ہے، سر جے جے تھامس (1910) اور البرٹ آئنسٹائن (1921) سے لے کر تکاکی کجیتا (2015) جسے نوبل انعام یافتگان سے بالواسطہ یا بلاواسطہ علمی رابطے کی روایت رکھتا ہے۔
پروفیسر قاضی مزہر نے مزید کہا کہ کسی تعلیمی ادارے کے لۓ یہ غیرمعمولی اعزاز کی بات ہے کہ اس نے اپنے قیام کے سو سال کامیابی کے ساتھ پورے کئے ہیں اور یہ علمی سفر مسلسل جاری ہے جو آج آنے والی نسلوں کی نئی بلندیاں حاصل کرنے کی تحریک دیتا ہے۔
یہ بھی پڑھیں:
فرینچ ٹوسٹ اور علیگڑھ مسلم یونیورسٹی
فیکلٹی آف سائنس کے ایڈمنسٹریٹر آفیسر عرفان خان نے خوشی کا اظہار کرتے ہوئے کہا کہ یہ میرے لئے فخر کی بات ہے کہ میں نے اسی یونیورسٹی سے تعلیم حاصل کی اور اسی یونیورسٹی کی تاریخی فیکلٹی آف سائنس میں ملازم ہو۔
"فیکلٹی آف سائنس کے 100 سال" کتاب میں جو گزشتہ سو برسوں میں سائنسداں، پیشاور ماہرین اور سائنس و ریاضی کے اساتذہ پیدا کئے ہیں جنہوں نے معاشرے کے لئے عظیم خدمات انجام دی ہیں ان سب کا ذکر کیا گیا ہے۔
کتاب کے اجراء کے موقع پر فیکلٹی آف سائنس کے شعبہ فزکس، ریاضی، کیمسٹری، جغرافیہ، جیولوجی، کمپیوٹر سائنس اور انٹر ڈسپنری ڈیپارٹمنٹ آف ایس ریموٹ سینسنگ اینڈ جی آئی ایس ایپلی کیشنز کے سربراہ موجود تھے۔
