اتر پردیش پولیس نے بتایا کہ قنوج کے تروا علاقے میں لکھنئو۔آگرہ ایکسپریس وے پر ایک تیز رفتار کار پلٹ جانے سے دو خواتین سمیت تین لوگوں کی موت ہوگئی، فگوا بھٹہ گاؤں کے نزدیک جمعرات کی صبح یہ حادثہ اس وقت پیش آیا جب ایک تیز رفتار کار بے قابو ہوکر ڈیوائیڈر سے ٹکرا کر پلٹ گئی، کار سے تین لوگوں کی لاشیں ملی ہیں۔ جن کی شناخت نہیں ہوسکی۔
اس کے علاوہ انہوں نے بتایا کہ بریلی میں وین اور سرکاری بس کی ٹکر میں تین لوگوں کی موت اور تین دیگر شدید طور پر زخمی ہوگئے۔
پولیس نے بتایا کہ مراد آباد۔فرخ آباد قومی شاہراہ پر سنجار پور گاؤں کے نزدیک صبح ایک وین مخالف سمت سے آرہی بس سے ٹکراگئی۔
اس حادثے میں شیو شنکر (60 برس)، ان کے فرزند راہل (28برس) اور راہل کا چچا زاد بھائی دیپک(25برس) کی موقع پر ہی موت ہوگئی جبکہ اس حادثے میں تین افراد شدید طور پر زخمی ہوئے جنہیں ضلع ہسپتال میں داخل کرایا گیا ہے، زخمیوں میں دو کی حالت تشویشناک بتائی جا رہی ہے۔
