طلاق ثلاثہ کو سپریم کورٹ نے غیر قانونی قرار دیا ہے، لیکن ابھی بھی ایسی خواتین ہیں، جنہیں ایک ساتھ تین طلاق دیا جا رہا ہے۔ یو پی حکومت ایسی خواتین کو ہر ماہ 500 روپے پینشن دینے کا فیصلہ لیا ہے۔
ساتھ ہی وقف بورڈ سے جواب مانگا ہے کہ ان خواتین کی وقف بورڈ کیسے مدد کر سکتا ہے؟ اتر پردیش کے وزیر اعلی یوگی آدتیہ ناتھ نے 25 ستمبر 2019 کو طلاق ثلاثہ متاثرہ خواتین کے فلاح وبہبود کے لئے اعلان کیا تھا کہ ایسی خواتین کا بہتر گزارا کیسے ہو۔ اس کے لئے کیا کیا جا سکتا ہے؟
جن خواتین کو ایک ساتھ تین طلاق دیا گیا ہو، انہیں انصاف ملنے تک یو پی حکومت کی جانب سے 500 روپے ماہانہ اور 6000 روپے سالانہ دیا جائے گا۔
ایسی خواتین کو 'وقف جائیداد' سے کس طرح فائدہ پہنچایا جاسکتا ہے؟ اس پر سنی و شیعہ وقف بورڈ کے چیف ایگزیکٹو آفیسر سے جواب مانگا گیا ہے۔
ای ٹی وی بھارت سے بات چیت کے دوران عرشیہ بانو نے کہا کہ اگر حکومت خواتین کے فلاح و بہبود کے لیے ایسا کر رہی ہے تو بہتر ہے، لیکن اس مہنگائی کے زمانے میں 500 روپے ماہانہ بطور پنشن کسی بھی طرح سے مناسب نہیں ہے۔ اسے بڑھا کر دو سے چار ہزار روپے ماہانہ کرنا چاہیے۔
نسرین بانو جو ایک طلاق شدہ خاتون ہیں، انہوں نے بتایا کہ میری دو بچیاں ہیں، جو اسکول میں پڑھتی ہیں اور میں چھوٹی سی دکان چلاتی ہوں۔ اس سے اتنی آمدنی نہیں ہو پاتی کہ پریوار کے اخراجات پورے ہو سکیں۔
ہم سرکار کے فیصلے کا خیر مقدم کرتے ہیں، لیکن 500 روپے ناکافی ہے۔ ہمارا حکومت سے مطالبہ ہے کہ اس مہنگائی کے دور میں، جہاں 500 روپے میں مہینے بھر کی سبزیاں بھی نہیں مل پاتی، اسے مزید بڑھا کر پانچ ہزار روپے کرنا چاہیے تاکہ ہم اپنے بچوں کا مستقبل روشن کر سکیں۔
