سی اے اے واپس نہیں تو جیل بھرو آندولن: عروسہ رانا

معروف شاعر منور رانا کی صاحبزادی عروسہ رانا نے کہا کہ 'اگر حکومت شہریت ترمیمی قانون کو واپس نہیں لیتی ہے تو یکم مارچ سے جیل بھرو آندولن شروع کیا جائے گا۔'

ملک بھرمیں شہریت ترمیمی قانون کے خلاف احتجاج ہو رہا ہے۔ عوام کا کہنا ہے جب تک مرکزی حکومت اس قانون کو واپس نہیں لیتی ہم لوگ اسی طرح احتجاج کرتے رہیں گے، لیکن آج علی گڑھ مسلم یونیورسٹی کے باب سید پر جاری احتجاجی دھرنے سے خطاب کرتے ہوئے عروسہ رانا نے کہا کہ 'اگر حکومت اس قانون کو واپس نہیں لیتی تو ہم یکم مارچ سے جیل بھرو آندولن کریں گے، کیونکہ ویسے بھی حکومت احتجاج کر رہے لوگوں کو جیل میں ڈال رہی ہے اور ان کے خلاف ایف آئی آر درج کر رہی ہے۔'

عروسہ رانا نے کہا کہ 'جس طریقے سے دہلی میں ان لوگوں کو کرنٹ لگا ہے، ان کو ریاست بہار اور دیگر ریاستوں میں بھی کرنٹ لگے گا۔'

عروسہ رانا نے کہا کہ 'میں طلباء کو بتانا چاہتی ہوں کے یہ جو آر ایس ایس کی سوچ والے لوگ ہیں یہ نہیں چاہتے کہ یہ ہمارا مستقبل بہتر ہو کیونکہ 'نہ سب کا ساتھ ہے اور نہ سب کا وکاس ہے۔ یہ صرف بڑی بڑی باتیں کر سکتے ہیں۔'