عالمی وبا کورونا وائرس کے کم ہوتی انفکشن شرح کے پیش نظر لمبے عرصے سے بند چل رہے اترپردیش کے اسکول جلد ہی بچوں سے گلزار ہونگے۔
کورونا انفکشن کے کم ہوتے معاملوں کے درمیان ریاست کی یوگی آدتیہ ناتھ حکومت نے جماعت ایک تا پانچ تک کے پرائمری اسکولوں کو یکم ستمبر اور جماعت چھ تا آٹھ تک کے اسکولوں میں درس و تدریس کا کام 23اگست سے شروع کرنے کی ہدایت دی ہے۔ ریاست کے محکمہ تعلیمات نے اس ضمن میں بدھ کو ضروری ہدایات سرکاری اسکولوں، منظور شدہ اسکولوں اور دیگر بورڈوں کے چلانے والے کالجوں کو جاری کئے ہیں۔
ریاست کے محکمہ تعلیمات میں اسپیشل سکریٹری آروی سنگھ نے ڈائرکٹر اسکول ایجوکیشن کو لکھے خط میں کہا ہے کہ کووڈ پروٹوکول پر عمل کرتے ہوئے جماعت ایک تا آٹھ تک کے اسکولوں کو کھولے جانے کی کاروائی کو یقینی بنایا جائے۔
یہ بھی پڑھیں:
مرادآباد: کورونا وائرس، تیسری لہرکے امکان کے مطابق انتظامیہ کی تیاریاں
قابل ذکر ہے کہ دو روز پہلے وزیر اعلی یوگی آدتیہ ناتھ نے جماعت ایک تا آٹھ تک کے اسکولوں کو دو مراحل میں کھولے جانے پر غور کرنے کو کہا تھا۔ انہوں نے کہا تھا کہ کورونا وبا اب کنٹرول میں ہے اور اسکولوں کو اب کھولنے کی سمت میں قدم اٹھا یا جاسکتا ہے۔16اگست سے جماعت 9تا12تک کے اسکولوں کو کھولا جاچکا ہے۔ یہاں دو مراحل میں اسکول کھولے جارہے ہیں۔
یو این آئی
