کرونا وائرس کے دوسرے خوفناک لہر کو دیکھتے ہوئے سی بی ایس ای بورڈ کے بعد یوپی بورڈ نے دسویں اور بارہویں جماعت کے امتحانات کو منسوخ کر دیا تھا جس کے بعد یوپی مدرسہ بورڈ لکھنؤ نے بھی سبھی درجات کی امتحانات کو منسوخ کردیا، تاہم یوپی بورڈ نے صلاحیت مند طلباء و طالبات کو موقع دیا ہے کہ وہ امتحان دے کر اپنے نمبرات میں اضافہ کرسکتے ہیں لیکن یوپی مدرسہ بورڈ نے ابھی تک اس سلسلے میں کوئی اعلان نہیں کیا ہے۔ جس کی وجہ سے طلبا و طالبات کشمکش کے شکار ہیں۔
صلاحیت مند طلباء و طالبات اس بات کو لے کر فکر مند ہیں کہ اگر ان کو نمبرات میں اضافہ کرنے کا موقع نہیں ملا توان کے تابناک مستقبل میں رخنہ پڑ سکتا ہے۔ اس سلسلے میں اتر پردیش ٹیچرز ایسوسی ایشن مدارس عربیہ کے جنرل سکریٹری مولانا دیوان صاحب زماں نے ای ٹی وی بھارت سے بات کرتے ہوئے کہا کہ جس طریقے سے یوپی بورڈ نے صلاحیت مند طلبہ کا خیال رکھتے ہوئے ان کو نمبرات میں اضافہ کرنے کا موقع دیا ہے اسی طریقے سے یوپی مدرسہ بورڈ کو بھی صلاحیت مند طلبا و طالبات کا خیال کرنا چاہیے اور ان کو نمبرات میں اضافہ کرنے کا موقع دینا چاہیے، تاکہ ان کے تابناک مستقبل میں کسی بھی قسم کی رکاوٹ نہ ہو۔
انہوں نے مزید کہا کہ ابھی تک بورڈ کی جانب سے اس سلسلے میں کوئی بھی اعلان جاری نہیں ہوا لیکن جب بھی اس سلسلے میں اعلان جاری ہوگا تو یہ ضرور مطالبہ کیا جائے گا کہ صلاحیت میں طلبہ کا خیال رکھا جائے اور ان کو موقع دیا جائے تاکہ وہ اپنے نمبرات میں اضافہ کر سکیں۔
