کورونا وبا کو دیکھتے ہوئے مرکزی حکومت Central Government نے جہاں ہائی اسکولوں اور انٹرمیڈیٹ کے امتحانوں کو منسوخ کرنے کا اعلان کیا ہے، وہیں اتر پردیش حکومت UP Government نے بھی جمعرات کو یوپی بورڈ کے امتحانات منسوخ کر دیا ہے۔ اس سمت میں یوپی مدرسہ ایجوکیشن بورڈ نے بھی ہونے والے امتحانات کو منسوخ کرنے کے لئے حکومت کو تجویز ارسال کی ہے جس پر مہر لگنے کے بعد اتر پردیش میں ہونے والے مدرسوں کے امتحانات منسوخ ہو جائیں گے۔
اتر پردیش کے قریب 16 ہزار مدرسوں میں وسطانیہ اور فوقانیہ کے امتحانات بھی اس بار نہیں ہوں گے۔ بورڈ نے سبھی بچوں کو آگے کی کلاس میں ترقی دینے کا فیصلہ کیا ہے۔ اس کی تجویز حکومت کو بھیج دی گئی ہے۔
مدرسہ بورڈ کے رجسٹرار آر پی سنگھ نے کہا کہ مدرسہ بورڈ کے سیکنڈری (منشی، مولوی) کے امتحانات دینے والے طلبا و طالبات کے امتحانات کے نتائج کا اعلان نمبروں کی بنیاد پر کیا جائے گا۔ اس کے لئے بورڈ نے تجویز بنائی ہے، جس پر حکومت کی مہر لگنا باقی ہے۔
مدرسہ بورڈ کے طلبا و طالبات کو ترقی دینے کے لئے یوپی مدرسہ بورڈ نے طالب علموں سے ششماہی اور پری بورڈ امتحان میں حاصل کیے گئے نمبر منگوائے ہیں جن طالب علموں کے نمبر کم آئے ہیں وہ اگلے سال امتحان میں شامل ہو کر نمبر میں بہتری کر سکتے ہیں۔ سینیئر سیکنڈری کے امتحانات کے لئے بھی اس سال تقریباً 45 ہزار طالب علموں نے درخواست دی ہے۔
