یوپی مدرسہ بورڈ کے منشی اور مولوی بورڈ امتحانات کا آغاز منگل سے ہو گیا۔ ان امتحانات کے لئے مدرسہ بورڈ کی جانب سے متعدد نئے کام کئے گئے ہیں۔
درا صل مدرسہ طلبہ کو امتحانات کے بوجھ اور فکر سے آزاد کرنے اور امتحانی مراکز میں بہتر ماحول دینے کے مقصد سے بارہ بنکی کے زیدپور قصبہ میں واقع مدرسہ دارالعلوم عارفیہ کو مثالی مرکز بنایا گیا ہے۔
امتحانات کے مدنظر مدرسہ کو پھولوں اور غباروں سے سجایا گیا تھا۔ اس مثالی مرکز کا قیام مدرسہ بورڈ کی ہدایت پر کیا گیا ہے۔
قابل غور ہے کہ 'بارہ بنکی سمیت تمام اضلاع میں آج سے مدرسہ بورڈ کے امتحانات کا آغاز ہو چکا ہے۔ ضلع میں 3818 طلبہ 11 امتحانی مراکز پر منشی اور مولوی کا امتحان دیں گے۔ اس برس سے یہ دونوں درجہ سیکنڈری اور ہائر سکینڈری کے نام سے جانیں جائیں گے۔'
اس کے علاوہ یہ پہلا موقع ہوگا جب مدرسہ بورڈ کے امتحانات اتنی کم وقفے میں ہوں گے۔ یہ امتحانات 10 دنوں میں ختم ہوں گے۔
مدرسہ بورڈ کے امتحانات کی شفافیت اور نقل سے پاک رکھنے کے لئے سی سی ٹی وی کیمروں سے لیس اسکول اور مدارس کو ہی مرکز بنایا گیا ہے۔
تمام امتحانی مراکز کو خصوصی طور پر ہدایت دی گئی ہے کہ مرکز پر طلبہ کو کسی بھی قسم کی پریشانی نہ ہو۔
