ریاست اتر پردیش کے بارہ بنکی میں ای ٹی وی بھارت کے ساتھ خصوصی گفتگو میں پی ایل پونیا نے کہا ہمیں فخر ہے کہ دنیا کے تمام ممالک کی طرح بھارت کے سائنس داں نے کووڈ-19 کی ویکسین تیار کی۔
انہوں نے حکومت کی حمایت کرتے ہوئے کہا کہ کوئی بھی حکومت ہوتی وہ ویکسین کا انتظام کرتی۔ مجھے نہیں لگتا کہ حکومت اس کا کریڈٹ لینے کی کوشش کر رہی ہے۔
انہوں نے حکومت کے سامنے تجویز رکھی کہ وہ یہ اعلان کرے کہ تمام غریبوں کو کووڈ-19 کی ویکسین مفت لگائی جائے گی۔
حزب اختلاف کی کچھ پارٹیوں کی جانب ویکسین پر اٹھنے والے سوالوں پر انہوں نے کہا کہ یہ ویکسین بھارت کے سائنسدانوں نے بنائی ہے، یہ ناگپور میں واقع سنگھ کے دفتر میں نہیں بنی ہے۔
انہوں نے کہا کہ ہمیں فخر کرنا چاہئے کہ دوسرے ممالک کے سائنسدانوں کی طرح یہاں کے سائنسدانوں نے ایک نہیں دو دو ویکسین تیار کی ہیں. انہوں نے نصیحت دی کی ویکسین کی برانڈنگ نہیں ہونی چاہیے۔
اترپردیش کے نظم و نسق کے سوال پر پونیا نے کہا کہ ریاست میں قانون نام کی کوئی چیز نہیں ہے۔ انہوں نے کہا کہ یہاں جنگل راج جیسے حالات ہیں۔
بدایوں اور لکھنؤ میں ہوئی واردات کا ذکر کرتے ہوئے انہیں نے کہا کہ ان تمام معاملوں میں ملزمان کو بچانے کی کوشش کی گئی۔ یہاں ہر بار یہی ہوتا ہے، جس کی وجہ سے نظم و نسق درست نہیں ہو پا رہا ہے۔
انہوں نے مزید کہا کہ نظم و نسق کو بہتر بنانے کے لئے حکومت کے پاس سیاسی قوت ارادی نہیں ہے. اس لیے ہم یہ تو نہیں کہتے کہ حکومت کو برخاست کر کے گورنر راج نافذ کر دیا جائے، لیکن حکومت ایسا کچھ کرے جس عوام بےخوف رہ سکے۔
