شہریت ترمیمی قانون کے خلاف احتجاجی مظاہروں کے دوران اترپردیش کے دیگر اضلاع کی طرح رامپور میں بھی بڑے پیمانے پر مظاہرین کو تشدد برپا کرنے کے الزام میں پولیس نے گرفتار کرکے جیل بھیج دیا تھا جو کہ 25 دن گزرنے کے بعد بھی ابھی تک جیل میں بند ہیں۔
رامپور کے علماء اور سرکردہ شخصیات نے ضلع انتظامیہ سے رابطہ کرکے کئی مرتبہ ان کی رہائی کا مطالبہ کر چکے ہیں لیکن اس کے باوجود بھی ابھی تک ایک بھی شخص کی رہائی نہیں ہو سکی ہے۔
علماء و ملی تنظیموں کی ناکامیوں سے تنگ آکر گرفتار افراد کے گھروں کی خواتین گذشتہ دو دنون سے جامع مسجد پر بیٹھی ہوئی ہیں اور علماء کے خلاف احتجاج کر رہی ہیں۔
مفتی شہر مولانا محبوب علی نے ای ٹی وی بھارت سے بات کرتے ہوئے کہا کہ انتظامیہ ہمیں دھوکہ میں رکھی ہوئی ہے، انہوں نے کہا کہ یہ لوگ جھوٹھے اور مکار ہیں۔
وہیں خواتین کے جامع مسجد پر بیٹھنے کے سوال پر انہوں نے کہا کہ ہم کلیکٹر نہیں ہیں ان کو کلکٹریٹ میں جاکر ڈی ایم کے سامنے اپنا احتجاج درج کرانا چاہیے۔
وہیں قاضی شہر مولانا خوشنود میاں نے کہا کہ یہ کہنا غلط ہے کہ ہم لوگ کچھ نہیں کر رہے ہیں، انہوں نے کہا کہ ہم اپنا کام کر رہے ہیں اور اس وقت تک کرتے رہیں گے جب تک کہ ہمیں اپنے مقصد میں کامیابی نہیں مل جاتی۔
اس موقع پر تنظیم اتحاد ملت کے صدر فرحت علی شاہ جمالی نے 21 دسمبر کے تمام مظاہرین کو بے قصور بتاتے ہوئے کہا کہ پولیس کی جانب سے لاٹھی چارج کئے جانے کی وجہ سے مظاہرین نے اپنے بچاؤ میں ہاتھوں میں پتھر اٹھا لیے تھے، اس لئے ہم تمام بے گناہوں کی رہائی کی مانگ کے ساتھ ہی انتظامیہ سے یہ بھی پوچھنا چاہتے ہیں کہ انتظامیہ نے مظاہرین کو جلسہ گاہ تک آخر کیوں نہیں جانے دیا۔
