ریاست اترپردیش میں ضلع کوشامبی کے کوکھراج علاقے کے مورت گنج بازار میں ایک بے قابو ٹرک نے چار مزدوروں کو کچل دیا جن میں سے دو کی موقع پر ہی موت ہوگئی۔
کوکھراج تھانہ انچارج اجیت پانڈے نے بتایا کہ 'الہ آباد۔کانپور روڈ پر واقع مورت گنج بازار میں منیش کمار کے مکان کا تعمیری کام چل رہا ہے۔ مزدور سڑک کے کنارے گٹھری اٹھاکر لے جارہے تھے۔ اسی دوران کانپور کی جانب سے آنے والی تیز رفتار بے قابو ٹرک نے چار مزدوروں کو اپنی زد میں لے لیا۔
انہوں نے بتایا کہ حادثے میں بھیکھمپور کے باشندے دلیپ گوسوامی اور منی لال کی موقع پر ہی موت ہوگئی جبکہ رام سنگھ اور کشن شدید طور پر زخمی ہوگئے۔ زخمیوں کو اسپتال میں داخل کروایا گیا ہے۔ پولیس نے ٹرک ڈرارئیور کو گرفتار کر لیا ہے۔
