بہرائچ: دو لڑکیوں کی خودکشی

ایڈیشنل سپرنٹنڈنٹ پولیس نے بتایا کہ گاؤں میں تفتیش کے دوران معلوم ہوا ہے کہ ان دونوں کے اہل خانہ ان کی دوستی سے خوش نہیں تھے، ان میں سے ایک کے والد نے ایک دوسرے سے ملاقات سے منع بھی کیا تھا۔

ریاست اترپردیش کے ضلع بہرائچ کے تھانہ رام گاؤں کے علاقہ گرام لونین پوروا میں دو نو عمر لڑکیوں کی لاشیں ایک درخت سے لٹکی ہوئی ملنے کے بعد علاقے میں سنسنی پھیل گئی، واقعہ کی اطلاع ملنے پر موقع پر پہنچی پولیس نے نعش کو اپنے قبضہ میں لے کر پوسٹ مارٹم کے لئے بھیج دیا ہے۔

ایڈیشنل سپرنٹنڈنٹ آف پولیس رورل اشوک کمار نے بتایا کہ تھانہ رام گاؤں کے علاقے کی گرام پنچایت دھرمن پور کے گاؤں لونین پوروا میں 17 سالہ اور 15 سالہ دو لڑکیاں پڑوس میں رہتی تھیں، دونوں کے مابین بہت ہی قریبی دوستی تھی، یہ دونوں مل کر گھر کا کام کرتی تھیں اور ساتھ ہی کھیت کا کام بھی کرتی تھیں، آج دونوں کی لاشیں گاؤں کے باہر درخت سے لٹکی ہوئی ملی ، ایسا لگتا ہے کہ ان دونوں نے ایک دوسرے کو آمنے سامنے کرکے پھانسی لگائی ہے۔

ایڈیشنل سپرنٹنڈنٹ پولیس نے بتایا کہ گاؤں میں تفتیش کے دوران معلوم ہوا ہے کہ ان دونوں کے اہل خانہ ان کی دوستی سے خوش نہیں تھے، ان میں سے ایک کے والد نے ایک دوسرے سے ملاقات سے منع بھی کیا تھا۔

انہوں نے بتایا کہ ان میں سے ایک نے آج اپنے گھر پر کھانا بنایا ، چائے پی تھی لیکن کھانا نہیں کھایا۔ دونوں صبح گھاس کاٹنے کے بہانے گھر سے نکلیں بعد میں کنبہ کو پتہ چلا کہ ان کی لاشیں گاؤں کے باہر درخت سے لٹکی ہوئی ہیں۔ معاملہ درج کر لیا گیا ہے اور اس سلسلے میں تفتیش کی جا رہی ہے۔