ریاست اترپردیش کے ضلع علی گڑھ میں واقع معروف ادارہ علی گڑھ مسلم یونیورسٹی کے وائس چانسلر پروفیسر طارق منصور نے ٹیلی فون پر دی گئی ہدایت کے بعد شائع نوٹس کے مطابق گذشتہ روز میڈیکل کالج ایمرجنسی اور ٹراما سینٹر میں تعینات میڈیکل آفیسرز کی تقرری کو بنا کسی وجہ کے معطل کرنے کے خلاف ڈاکٹرز نے خط لکھ کر مطالبہ کیا ہے کہ فورا ڈاکٹرز کی معطلی نوٹس کو منسوخ کریں، ورنہ احتجاج کریں گے۔
اے ایم یو جواہر لعل نہرو میڈیکل کالج ایمرجنسی اور ٹراما سینٹر میں تعینات میڈیکل آفیسرز ڈاکٹر محمد عظیم الدین ملک اور ڈاکٹر عبید امتیاز الحق کو گذشتہ روز ان کی تقرریوں سے فوری طور پر معطل کر دیا گیا ہے۔
نوٹس کے مطابق وائس چانسلر پروفیسر طارق منصور کے ذریعے دی گئی ہدایت کے بعد ڈاکٹر ایس اے ایچ زیدی (میڈیکل، آفیسر انچارج) میڈیکل کالج نے نوٹس شائع کیا تھا۔
اے ایم یو جواہر لعل نہرو میڈیکل کالج ریسیڈنٹ ڈاکٹرز ایسوسی ایشن کے صدر ڈاکٹر حمزہ ملک نے بتایا کہ جس طرح سے گزشتہ روز میڈیکل آفیسر کی جانب سے ایک نوٹس شائع کیا گیا ہے جس میں وائس چانسلر کے کہنے پر ٹراما سینٹر میں تیعنات میڈیکل آفیسرز ڈاکٹر عبید اور ڈاکٹر عظیم الدین کو فوری طور پر معطل کر دیا گیا ہے جس کے خلاف آر ڈی اے کی جانب سے ایک خط لکھا گیا ہے۔
اس خط میں مطالبہ کیا گیا ہے کہ دونوں ڈاکٹرز کی معطلی کو فورا واپس لیا جائے۔ اگر یونیورسٹی انتظامیہ دونوں ڈاکٹرز کو واپس لیتا ہے تو آر ڈی اے اس فیصلے کا استقبال کرے گا، ورنہ ہم اپنا جمہوری حق کا استعمال کرتے ہوئے احتجاج کریں گے۔
