تصادم میں دو انعامی بدمعاش گرفتار

ریاست اترپردیش کے مرادآباد کے ٹھاکر دوار علاقے میں آج صبح پولیس اور بدمعاشوں کے درمیان تصادم میں دو انعامی بدمعاش زخمی ہوگئے جب کہ ایک پولیس سب انسپکٹر بھی زخمی ہوگیا۔

پولیس نے بتایا کہ صبح تقریباً ساڑھے چار بجے ٹھاکر دوار علاقے میں بلاری مارگ پر چیکنگ کے دوران موٹر سائیکل پر سوار دو بدمعاشوں کو پولیس نے روکنے کی کوشش کی۔ خود کو گھرا ہوا دیکھ کربدمعاش پولیس پر فائرنگ کرتے ہوئے بھاگنے لگے۔ ان کی گولی سے سب انسپکٹر مکیش راجورا زخمی ہوگئے۔

پولیس نے جوابی فائرنگ کی جس میں دونو ں بدمعاش زخمی ہوگئے جنہیں گرفتار کرلیا گیا۔ ا ن میں ایک عمران مرادآباد کا رہنے والا ہے جب کہ سلیم بجنور ضلع کا باشندہ ہے۔ زخمی بدمعاشوں اور سب انسپکٹر کو ہسپتال میں داخل کیا گیا ہے۔

پولیس نے تبایا کہ گرفتار بدمعاشوں کے پاس سے دو طمنچے اور کچھ کارتوس اور لوٹے گئے دو لاکھ 52 ہزارروپے برآمد ہوئے ہیں۔ ان دونوں کے خلاف کئی مقدمات پہلے سے ہی درج ہیں۔ ان کی گرفتاری پر پولیس نے دس دس ہزار روپے کے انعام کا اعلان کیا تھا۔