دودھ پینے سے بچے بیمار

ریاست اترپردیش کے ضلع متھرا میں پیکٹ کا دودھ پینے سے تقریباً ایک درجن بچوں کی طبیعت بگڑ گئی اور ان میں سے دو بچے ہلاک ہو گئے۔

ریاست اترپردیش کے ضلع متھرا میں اس وقت سنسنی پھیل گئی جب بال سسورا کے چلڈرن کیئر ہوم میں تقریباً ایک درجن بچوں کو الٹی اور دست کی شکایت ہونے لگی جس کی وجہ سے بچوں کو علاج کے لیے ضلعی اسپتال میں داخل کرایا گیا، جہاں دو بچوں کی علاج سے پہلے ہی موت ہو گئی اور چار بچوں کو آگرہ منتقل کر دیا گیا جب کہ چھ بچوں کا ضلعی اسپتال میں ہی علاج چل رہا ہے۔

چیف ڈیولپمنٹ آفیسر رام نواس نے بتایا کہ 'چلڈرن کیئر ہوم میں بچوں کی صحت خراب ہوئی ہے جس میں 2 بچے موقع پر ہی دم توڑ گئے، ایک بچہ 6 ماہ کا ہے اور دوسری بچی 2 برس کی ہے۔ علاج کے لیے 4 بچوں کو ایس این میڈیکل کالج منتقل کیا گیا ہے جبکہ 6 بچوں کا ڈسٹرکٹ اسپتال میں ہی علاج جاری ہے، اس سارے معاملے میں غفلت برتنے والے افسران کے خلاف سخت کارروائی کی جائے گی۔'

واضح رہے کہ بچوں نے صبح کے وقت پیکٹ والا دودھ پیا تھا جس کی وجہ سے انہیں دست اور الٹی کی شکایت ہونے لگی تھی۔