بارہ بنکی : مجاہد آزادی عبدالقیوم انصاری کی برسی پر حکومت کو میمورنڈم

کانگریس اقلیتی سیل نے بتایا کہ کچھ بنکر تو ایسے بھی ہیں جو بنکری میں کام آنے والا سامان فروخت کرکے اپنا گزارا کر رہے ہیں۔

اتر پردیش کے شہر بارہ بنکی میں دوشنبہ کو مجاہد آزادی عبدالقیوم انصاری کی برسی کے موقع پر کانگریس اقلیتی سیل نے بنکروں کے مسائل کے حل کے لیے وزیر اعلی یوگی ادتیاناتھ کو پانچ نکاتی میمورنڈم سونپا۔

میمورنڈم کے ذریعہ وزیر اعلیٰ کو بنکروں کی صورت حال سے روبرو کرایا گیا اور ان کے تمام مسائل کو حل کرنے کا مطالبہ کیا گیا ہے۔

اس موقع پر کانگریس اقلیتی سیل نے وزیراعلیٰ کو بتایا 'لاک ڈاؤن کی وجہ سے بنکروں کا قدیمی پیشہ برباد ہو گیا ہے۔ جس کی وجہ سے بنکر بھکمری کی کگار پر ہیں اور محنت مزدوری کر کے اپنا گزارا کر رہے ہیں'۔

انہوں نے بتایا 'کچھ بنکر تو ایسے بھی ہیں جو بنکری میں کام آنے والا سامان فروخت کر کے اپنا گزارا کر رہے ہیں'۔

کانگریس اقلیتی سیل نے بنکروں کو فلیٹ ریٹ پر بجلی موصول کرانے کے ساتھ بنکروں کے کٹے کنیکشن کو دوبارہ جوڑنے، بنکروں کا جنوری 2020 تک بقایا بل معاف کرنے کا مطالبہ کیا ہے۔

اس کے علاوہ ایس سی ایس ٹی بنکروں کے لیے بنائی گئی اسکیمز میں او بی سی بنکروں کو بھی شامل کئے جانے کا مطالبہ کیا گیا ہے۔