اتر پردیش کے بارہ بنکی میں کورونا کی دوسری لہر میں ہلاک ہونے والے محکمہ جنگلات کے ملازمین کو حکومتی ملازمین کی تنظیم راجیہ کرمچاری سنیکت پریشد کی جانب سے خراج عقیدت پیش کیا گیا۔
اس دوران ڈی ایف او دفتر کے احاطے میں ہلاک شدہ ملازمین کی تصویر کے سامنے شمع روشن کر کے گلپوشی کی گئی اور دو منٹ کا مون رکھا گیا، اس کے بعد ملازمین تنظیموں کے تمام اراکین نے یقین دہانی کرائی کہ وہ مہلوکین کے اہل خانہ کے ساتھ ہمیشہ کھڑے رہیں گے۔
اطلاعات کے مطابق کووڈ 19 کی دوسری لہر میں محکمہ جنگلات کے تقریبا 6 ملازمین ہلاک ہوئے ہیں۔ ان میں سے تین کی رپورٹ کووڈ مثبت آئی تھی، جبکہ محکمہ جنگلات کے افسران کے مطابق ریاستی سطح پر تقریبا 40 حکومتی ملازمین ہلاک ہوئے ہیں۔
حکومتی ملازمین کی تنظیم راجیہ کرمچاری سنیکت پرشد کے ضلع وزیر آر پی سنگھ بسین نے کہا کہ ریاستی حکومت نے کورونا وبا کے دوران ملازمین کے لئے کئی اقدامات کئے ہیں۔ ان میں سے ایک کا بھی فائدہ ملازمین کو نہیں ہوا ہے۔
انہوں نے کہا کہ مصیبت کی اس گھڑی میں بھلے ہی حکومت ان کے ساتھ نہ ہو لیکن ہم ان کے اہل خانہ کے ساتھ ہمیشہ کھڑے رہیں گے۔
