ریاست اترپردیش کے ضلع بلند شہر میں پولیس نے جہیز کے خاطر قتل کے معاملے میں تین ملزمین کو گرفتار کرکے انہیں جیل بھیج دیا۔
سینیئر سپرنٹنڈنٹ آف پولیس سنتوش کمار سنگھ نے بتایا کہ کوتوالی شہر کے محلہ اسلام آباد میں عامر نے 23 جولائی کو تھانے میں اطلاع دی کی اس کی بیوی وارثہ گھر سے 30 ہزار روپے، سونے، چاندی کے زیورات لے کر کہیں فرار ہوگئی ہے۔
جس کے بعد اس معاملے میں پولیس نے گمشدگی کی رپورٹ درج کرلی تھی۔
انہوں نے بتایا کہ 27 جولائی کو غازی آباد کے صاحب آباد علاقے کی دشمیش کالونی کے نزدیک لاوارث سوٹ کیس میں خاتون کی لاش ملی، جس کی شناخت وارثہ کے طور پر کی گئی۔
انہوں نے بتایا کہ وارثہ کا نکاح گذشتہ ماہ یکم جون کو عامر کے ساتھ ہوا تھا، شادی کے بعد سسرال والے اسے زیادہ جہیز کا مطالبہ کرتے ہوئے پریشان کررہے تھے، اتنا ہی نہیں اس کے ساتھ مارپیٹ بھی کرتے تھے۔
الزام ہے کہ جہیز کا مطالبہ پورا نہ ہونے پر اس کے شوہر نے اپنے والدین کے ساتھ مل کر وارثہ کا قتل کردیا اور ثبوت مٹانے کے لیے اس کی لاش سوٹ کیس میں رکھ کر صاحب آباد علاقے میں پھینک دی تھی۔
پولیس نے عامر کو جھوٹی اطلاع دے کر گمراہ کرنے کا خاطی مانا ہے، اور جہیز کے خاطر قتل کرنے کا مقدمہ درج کرکے عامر اور اس کے والد مسلم اور ماں جمیلہ کو گرفتار کرکے جیل بھیج دیا ہے۔
