سہارنپور میں دیوبند کے گاؤں سین پور میں مبینہ طور پر ماموں زاد بھائی کے ذریعے ہوس کا شکار ہونے والی ٹرین کے سامنے کود کر خودکشی کر لی۔ پولیس نے لاش کو قبضہ میں لے کر پوسٹ مارٹم کے لیے بھیج دیا ہے ۔
موصولہ اطلاع کے مطابق آج صبح تقریباً 9 بجے سین پور ریلوے کراسنگ کے قریب ایک لڑکی کی لاش پڑی ہونے کی اطلاع سے علاقہ میں سنسنی پھیل گئی، موقع پر پہنچی پولیس نے لاش کو قبضہ میں لے لیا ، مرنے والی کی شناخت دیوبند علاقہ کے ہی ایک گاﺅں کے رہنے والی کے طو رپر ہوئی۔
بتایا جاتا ہے کہ لڑکی صبح سے اپنے گھر سے غائب تھی اور اس کے اہل خانہ اس کی تلاش کررہے تھے ،بتایاجاتا ہے کہ گزشتہ رات لڑکی کو اس کے ماموں زاد بھائی نے مبینہ طور پر زبردستی اپنی ہوس کاشکار بنایا تھا جس سے لڑکی بے حد غمزدہ تھی ، اسی وجہ سے اس نے ٹرین کے سامنے کود کر اپنی زندگی کو ختم کرلیا۔
لڑکی کے چچا زاد بھائی کے مطابق گزشتہ روز ان کاپورا خاندان ریاست اتراکھنڈ کے روڑکی گیا ہوا تھا اور گھر پر لڑکی اپنی چھوٹی بہن کے ساتھ اکیلی تھی۔
الزام ہے کہ گزشتہ شام گھر پہنچے لڑکی کے ماموں زاد بھائی نے اسی کا فائدہ اٹھاتے ہوئے لڑکی کے ساتھ زبردستی کرتے ہوئے جنسی زیادتی کی۔ آج صبح جب اہل خانہ واپس لوٹے تو لڑکی نے اپنے ساتھ ہوئی زیادتی کی کہانی اہل خانہ کو بتائی جسے سن کر ان کے پیروں تلے زمین کھسک گئی جس کے بعد لڑکی اچانک گھر سے غائب ہوگئی۔
اہل خانہ اسے تلاش ہی کررہے تھے کہ اتنے میں ریلوے کراسنگ پر لڑکی کی لاش پڑی ہونے کی اطلاع اہل خانہ کو ملی جسے سن کر اہل خانہ میں کہرام مچ گیا۔
پولیس نے لاش کو قبضہ میںلے کر پوسٹ مارٹم کے لئے بھیج دیا ہے، حالانکہ خبر لکھے جانے تک لڑکی کے اہل خانہ کی طرف سے پولیس کو کوئی تحریر نہیں دی گئی تھی۔
