پریاگ راج: گیانواپی مسجد کے اے ایس آئی سروے معاملے میں الہ آباد ہائی کورٹ نے بڑا فیصلہ سنایا ہے۔ عدالت نے اے ایس آئی کے سروے پر روک لگانے سے انکار کر دیا ہے۔ عدالت نے کہا کہ اس سروے سے کسی کو نقصان نہیں پہنچے گا۔ گیانواپی مسجد کے سروے پر الہ آباد ہائی کورٹ نے مزید روک لگانے سے انکار کر دیا ہے اور سروے کو جاری رکھنے کی اجازت دے دی ہے۔ عدالت نے سروے پر پابندی لگانے سے انکار کرتے ہوئے کہا کہ یہ سروے انصاف کے لیے ضروری ہے۔ اسے کچھ شرائط کے ساتھ لاگو کرنے کی ضرورت ہے۔
اس سے قبل مسجد احاطے کا سروے کرنے کے معاملے پر الہ آباد ہائی کورٹ میں دونوں فریق نے مسلسل دو دن تک بحث کی تھی۔ دونوں جانب سے دلائل پیش کیے گئے تھے۔ عدالت نے 27 جولائی کو فریقین کے دلائل سننے کے بعد اس معاملے میں اپنا فیصلہ محفوظ کر لیا تھا۔ گیانواپی مسجد کے سروے پر الہ آباد ہائی کورٹ نے اپنا فیصلہ سنادیا ہے۔ جس میں سروے کی اجازت دے دی گئی ہے۔
مزید پڑھیں: گیان واپی کے اے ایس آئی سروے معاملے پر آج ہائی کورٹ کا اہم فیصلہ
واضح رہے کہ وارانسی ڈسٹرکٹ کورٹ نے 21 جولائی کو گیان واپی مسجد احاطے کی اے ایس آئی سے سائنٹفک سروے کرانے کی ہدایت دیتے ہوئے چار اگست تک اس کی رپورٹ عدالت کو پیش کرنے کی ہدایت دی تھی۔ تاہم اس فیصلے کے بعد انجمن انتظامیہ مساجد کمیٹی سپریم کورٹ سے رجوع ہوئی۔ سپریم کورٹ نے اپنے عبوری فیصلے میں وارانسی ڈسٹرکٹ کورٹ کے فیصلے پر روک لگا دی اور انجمن کو ہدایت دی کہ وہ اس ضمن میں الہ آباد ہائی کورٹ سے رجوع کرے۔
