ریاست اترپردیش کے ضلع مظفرنگر میں شاہ ولی اللہ اسلامک لائبریری میں آج ایک پروگرام منعقد کیا گیا جس میں سردی سے بچنے کے لیے گرم کپڑے، کمبل اور لحاف وغیرہ ضرورت مند افراد میں تقسیم کئے گئے۔
مظفر نگر کی تاریخی جامع مسجد حوض والی مسجد لوہیا بازار میں واقع معروف علمی و دینی ادارا شاہ ولی اللہ اسلامک لائبریری کے شعبہ خدمت خلق کے زیر اہتمام پروگرام کا انعقاد کیا گیا جس میں کمبل و لحاف، گرم کپڑے وغیرہ تقسیم کئے گئے۔
پروگرام کا آغاز مولانا محمد حذیفہ مظاہری کی تلاوت قرآن پاک سے ہوا اور بارگاہ رسالت میں نعت پاک قاری حفظ الرحمن صاحب امام مسجد انصاریان نے پیش کی، پروگرام کی صدارت معنی لائبریری قاری محمد خالد قاسمی نے کی۔
قاری محمد خالد قاسمی نے صدارتی خطاب میں کہا کہ خدمت خلق ایک بڑی عبادت ہے، یہ ایک ایسا عمل ہے جس کے کرنے سے انسان خدا اور بندے دونوں کا منظور نظر بن سکتا ہے، آپ نے لائبریری کے شعبہ خدمت خلق کے ذریعے غریب، بے سہارا مریضوں اور کمزوروں کی مدد کی اجمالی تفصیل بھی بیان کی۔
اس موقع پر معروف صحافی جناب عزیز الرحمن خان، راشٹریہ سہارا اردو جناب گلفام احمد، صحافی شاہ ٹائمز ہندی ظفر اقبال، صحافی ای ٹی وی اردو حیدرآباد جناب شاہد ارمان حسینی، صحافی اخبار مشرق اردو نے تشریف لا کر لائبریری کی خدمات کو سراہا اور اپنے قیمتی خیالات کا اظہار کیا۔
پروگرام کے اختتام پر شہر مظفرنگر کی مختلف مساجد کے معززین حضرات کو کمبل دیا گیا، اساتذہ مدارس کو گرم کپڑے دیے گئے اور خواتین میں جائے نماز تقسیم کی گئی۔
