اترپردیش حکومت کے چار سال مکمل ہونے پر ضلع کے تمام ترقیاتی بلاکس پر کسان فلاحی مشن کا انعقاد کیا گیا۔کسانوں کے لئے منعقدہ تقریب میں کسان ہی غائب رہے۔ پروگرام میں حکومت ہند اور اترپردیش حکومت کے ذریعہ کسانوں کے مفاد کے لئے چلائی جانے والی مختلف اسکیموں کے بارے میں کاشت کاروں کو معلومات فراہم کی گئیں۔
خبر کے مطابق ضلع گوتم بدھ نگر کے بسرکھ ڈویلپمنٹ بلاک میں منعقدہ پروگرام میں بی جے پی کے ایم ایل سی سری چند شرما نے بطور مہمان خصوصی شرکت کی۔ انہوں نے کہا کہ حکومت کاشتکاروں کے مفاد میں مستقل طور پر کام کررہی ہے۔
پروگرام میں ڈپٹی ڈائریکٹر زراعت ڈاکٹر منویر سنگھ نے زراعت پروڈیوسر ایسوسی ایشن اور دیہی ترقی کے ذریعہ معاش کے مشن کے بارے میں تفصیلی گفتگو کی۔ اس پروگرام میں زرعی سائنس سینٹر کے سائنس دان ڈاکٹر مینک رائے و دیگر سائنس دان، محکمہ زراعت کے، کے پی سنگھ، سنجے تومر اور دیگر متعلقہ عہدیدار بھی موجود تھے۔
ڈویلپمنٹ بلاک جیور کے پروگرام میں رکن اسمبلی دھریندر سنگھ نے کسانوں کو حکومت کی طرف سے چلائی جارہی اسکیموں سے فائدہ اٹھانے اور ماحولیاتی آلودگی سے ہونے والے نقصانات سے محتاط رہنے کی تلقین کی۔ تمام بلاک سطح کے پروگراموں میں کاشتکاروں کے مفادات اور متعلقہ محکمہ جاتی افسران کے ذریعے گرینڈ اسٹالز بھی لگائے گئے۔ جس میں قومی دیہی ذریعہ معاش مشن کے ذریعہ تیار کردہ مصنوعات، جیسے ماسک، دستکاری کی نمائش، نامیاتی زراعت کی مصنوعات کی نمائش اور دیگر محکموں کے اسٹال لگائے گئے تھے۔
