عید میلاد النبی کے موقع پر مولانا خالد رشید فرنگی نے مبارکباد پیش کرتے ہوئے کہا کہ ہم سب کی ذمہ داری ہے کہ کووڈ 19 گائیڈلائن پر عمل کرتے ہوئے پیغمبر اسلام کی تعلیمات کو عام کریں۔
انہوں نے کہا کہ پیغمبر اسلام حضرت محمد صلی اللہ علیہ وسلم کائنات کے لئے رحمت بنا کر بھیجے گئے ہیں۔ ہمیں ان کی تعلیمات پر عمل کرتے ہوئے ان کے پیغامات کو دوسروں تک پہنچانا چاہیے۔
مولانا فرنگی نے کہا کہ اس بار کورونا وائرس کے سبب 12 ربیع الاول کے دن نہ جلوس نکالا جا سکا اور نہ ہی سابقہ سالوں کی طرح عید میلاد النبی منعقد کی گئی لیکن کورونا سے بچنا بھی نہایت ہی ضروری ہے۔
قابل ذکر ہے کہ ضلعی انتظامیہ نے جلوس محمدی نکالنے کی اجازت نہیں دی۔ حالانکہ ذمہ داران کا کہنا تھا کہ ہم کووڈ 19 گائیڈلائن کے تحت جلوس نکالیں گے اور جو بھی ہدایات دی گئی ہیں، ان پر عمل کریں گے۔ باوجود اس کے انہیں اجازت نہیں دی گئی۔ اسی کے مدنظر لکھنؤ میں آج ہر جانب خاموشی طاری رہی۔
