علیگڑھ: علیگڑھ مسلم یونیورسٹی (اے ایم یو) رجسٹرار دفتر کی جانب سے کل شب دو نوٹس جاری کیے گئے ہیں جو سوشل میڈیا پر تیزی سے وائرل ہو رہے ہیں۔ جاری کردہ پہلے نوٹس کے مطابق 30 اکتوبر 2023 کو دن 12 بجے سر سید ہاؤس میں خصوصی میٹنگ ہوگی، جس میں اے ایم یو کے مستقل وائس چانسلر کے لیے پانچ امیدواروں کا پینل بنایا جائے گا۔ جاری کردہ دوسرے نوٹس کے مطابق 6 نومبر کو یونیورسٹی کے این آر ایس سی ہال میں اے ایم یو کورٹ کی خصوصی میٹنگ صبح 11 بجے ہوگی۔ جس میں ایگزیکٹیو کونسل کی میٹنگ میں مستقل وائس چانسلر کے پانچ امیدواروں کے پینل میں سے تین ناموں کا انتخاب کرکے صدر جمہوریہ کے پاس کسی ایک کی نامزدگی کے لیے بھیجا جائے گا۔
AMU Joint Action Committee اے ایم یو کے مستقل وائس چانسلر کے لئے جوائنٹ ایکشن کمیٹی کا اجلاس
یونیورسٹی رجسٹرار دفتر کی جانب سے جاری نوٹس کے بعد یونیورسٹی کیمپس میں خوشی دیکھی جارہی ہے کیونکہ گزشتہ 18 ماہ سے یونیورسٹی کیمپس میں کوئی مستقل وائس چانسلر نہیں ہے۔ جس کا مطالبہ یونیورسٹی کے اساتذہ، طلباء اور سابق طلباء کر رہے ہیں، قبل ازیں طلبا نے علیگڑھ کے بعد نئی دہلی جنتر منتر پر بھی ایک روزہ دھرنا دیا تھا۔
واضح رہے کہ اے ایم یو ملک کا واحد تعلیمی ادارہ ہے، جس کو اپنی یونیورسٹی کا وائس چانسلر چننے کا حق حاصل ہے۔ جس کے لیے پہلے ایگزیکٹیو کونسل (ای سی) کے اراکین پانچ امیدواروں کا پینل بناتے ہیں۔ اس کے بعد اے ایم یو کورٹ کے اراکین پانچ امیدواروں کے پینل سے تین امیدواروں کے نام صدر جمہوریہ کو بھیجتے ہیں۔ جن میں سے صدر جمہوریہ کسی ایک کو اے ایم یو کا وائس چانسلر پانچ سال کے لیے مقرر کرتے ہیں۔
