بارہ بنکی: مرکزی حکومت کے خلاف راج ناتھ شرما کا اپواس

اتر پردیش کے ضلع بارہ بنکی میں سماجی کارکن راج ناتھ شرما نے اتوار کو مرکزی حکومت کی تمام پالیسیوں، مہنگائی، پیٹرولیم کی قیمتوں میں اضافے، ریل کرائے میں اضافے اور تینوں زرعی قوانین کے خلاف ایک روزہ اپواس کیا۔ راج ناتھ شرما نے اس دوران مرکزی حکومت کو شدید تنقید کا نشانہ بنایا۔ ان کا دعویٰ ہے کہ مرکزی حکومت سے عوام کا اعتماد ختم ہو گیا ہے۔

بارہ بنکی کے سول لائن واقع گاندھی بھون کے احاطے میں مہاتما گاندھی کے مجسمے کے نیچے اپواس کر رہے راج ناتھ شرما نے کہا کہ 90 روز سے مسلسل چلی آ رہی کسانوں کی تحریک دنیا کے تمام جمہوری ملکوں کی تاریخ میں سب سے بڑی تحریک ہے اور حکومت کسانوں کے مطالبات نہ مان کر صورتحال کو اور تشویشناک بنا رہی ہے۔

انہوں نے واضح طور پر کہا کہ مرکزی حکومت سے عوام کا اعتماد ختم ہو گیا ہے، کیونکہ یہ حکومت اسی بنیاد پر اقتدار میں آئی تھی کہ گزشتہ حکومت سے عوام کو نہ ملنے والی سہولیات کو یہ فراہم کرے گی۔ لیکن اس حکومت نے آنے کے بعد تمام ایسے کام کئے جس سے عوام پریشان ہو رہی ہے۔

انہوں نے الزام عائد کیا کہ یہ حکومت ملک کو غریبی اور فاقہ کشی کی جانب لے جا رہی ہے۔ مہنگائی میں اضافہ، ریل، پیٹرولیم مصنوعات کی قیمتوں میں اضافے سے ملک کا کمزور طبقہ کافی پریشان ہو رہا ہے۔