ریاست اتر پردیش کے بارہ بنکی ضلع کے اقلیتی درجہ حاصل اسکولز میں گزشتہ چار برسوں سے اساتذہ کی تقرری نہیں ہوئی ہے۔ جس کی وجہ سے اقلیتی درجہ حاصل ثانوی اسکولز میں اساتذہ کی کمی ہے۔ اساتذہ کی کمی سے طلباء کی پڑھائی متاثر ہو رہی ہے۔
واضح رہے کہ ضلع میں کل پانچ اقلیتی درجہ حاصل ثانوی اسکول ہیں۔ ان اسکولز میں سنہ 2017 سے مسلسل ٹیچرز سبکدوش ہوتے جا رہے ہیں لیکن ان اسکولز میں تقرری کے قوانین میں تبدیلی کی وجہ سے ٹیچرز کی تقرری نہیں ہو پا رہی ہے۔
سنہ 2017 سے قبل تک اقلیتی درجہ حاصل ثانوی اسکولز کی مینیجمینٹ کمیٹی کو اختیار تھا کہ وہ ٹیچرز کی تقرری کرے لیکن سنہ 2017 میں کچھ شکایات کی وجہ سے اس میں تبدیلی کر دی گئی ہے۔ یہ معاملہ عدالت تک بھی پہونچا جس کی وجہ سے اور تاخیر ہوئی۔
یہ بھی پڑھیں: ترال کے سرکاری اسکول میں اساتذہ کی کمی، لوگوں کا احتجاج
گزشتہ کچھ دنوں میں دیگر ثانوی اسکولز میں ٹیچرز کی کمی کو پورا کرنے کے لئے کثیر تعداد میں اساتذہ کی تقرری ہوئی ہے لیکن ابھی تک اقلیتی اداروں کا یہ مسئلہ حل نہیں ہوا ہے۔
وہیں اسکولز کے ذمہ داران کا کہنا ہے کہ جلد ہی اقلیتی درجہ حاصل ثانوی اسکولز میں اساتذہ کی تقرری کا عمل شروع کریں گے۔
