میرٹھ: ریاست اتر پردیش کے ضلع میرٹھ میں رمضان المبارک کی تیاریوں کو لیکر شہر قاضی میرٹھ نے مسلمانوں سے اپیل کرتے ہوئے کہا کہ رمضان المبارک کے مہینے میں مسلمان اپنے عمل سے اپنے ہم وطن بھائیوں کے لیے نظیر پیش کریں۔ خاص طور پر افطار اور سہری کے وقت لاؤڈ-اسپیکر کی آواز کو ضرورت کے مطابق ہی رکھیں تاکہ کسی کو شکایت کرنے کا موقع نہ ملے۔ شہر قاضی زین الساجدین نے شاہی جامع مسجد میں آج اپنے خطبہ میں کہا رمضان کا مہینہ مسلمانوں کے لیے سب سے اہم ہوتا ہے۔ مسلمانوں کو اس کی اہمیت کو سمجھنے کی ضرورت ہے۔ پورا مہینہ عبادت کے لیے ہے۔ اس لیے تمام مسلمانوں کو اپنا زیادہ تر وقت عبادت میں گزارنے کی کوشش کرنی چاہیے۔
یہ بھی پڑھیں:Hajj 2023 حج ٹرینر کے لیے آن لائن درخواست طلب، آخری تاریخ 27 مارچ
انہوں نے کہا کہ افطار اور سہری کے وقت لاؤڈ-اسپیکر کی آواز مناسب رکھیں، خاص طور پر اگر کسی علاقے میں دس مساجد ہیں تو صرف ایک یا دو مساجد میں ہی لاؤڈ-اسپیکر کی آواز اتنی رکھیں کہ اذان کی آواز گھروں تک پہنچ سکے۔ ماسجد کے ذمہ داران کو اس کا خصوصی خیال رکھنے کی ضرورت ہے۔ اس سے کئی باتیں جڑی ہوئی ہے۔ ان کا کہنا ہے کہ مسلمانوں کو روزہ رکھنے کے ساتھ نماز کی اہمیت کو بھی سمجھنے کی ضرورت ہے۔ خاص طور پر اس بات کا خیال رکھیں کہ اپنے کردار سے ہم وطن بھائیوں کو کسی بھی طرح کی کوئی پریشانی نہ ہو۔ مسلمانوں کو وقت اور حالات کو دیکھ کر کام کرنے کی ضرورت ہے۔ ہم سے کسی کو کوئی تکلیف نہ پہنچے۔
