رامپور کی تاریخی صولت پبلک لائبریری ایک طویل عرصہ سے تنازعات کا شکار ہے۔ گزشتہ دنوں لائبریری کے صدر سین شین عالم کے انتقال کے بعد لائبریری کے عہدیداران اور اراکین کے درمیان تنازع اس وقت مزید بڑھ گیا جب لائبریری کے سکریٹری مولانا اسلم جاوید قاسمی نے لائبریری کے رکن ذیشان مراد کو اپنے کل اختیارات کے تحت کارگزار صدر کے طور پر منتخب کیا۔
اطلاعات کے مطابق لائبریری کے متعدد اراکین سکریٹری کے کارگزار صدر منتخب کرنے کے مذکورہ فیصلہ کو غلط قرار دے رہے ہیں، اس سلسلے میں آج صولت پبلک لائبریری کی مجلس عاملہ کا اجلاس بلایا گیا ہے۔
ای ٹی وی بھارت نے لائبریری کے سکریٹری مولانا اسلم جاوید قاسمی سے مجلس عاملہ کے اجلاس سے متعلق بات چیت کی۔ انہوں نے کہا کہ ہمارا پہلا ہدف یہ ہے کہ جلد از جلد لائبریری کے صدر کا انتخاب کرایا جائے۔
انہوں نے کہا کہ ہماری پوری کوشش یہی رہے گی کہ جو اختلافات ہیں وہ جلد ختم ہوں۔ ساتھ ہی انہوں نے کہا کہ ملک کے تقریباً تمام چھوٹے بڑے اداروں سے وابستہ اراکین کو کچھ نہ کچھ شکایات رہتی ہیں لیکن ہمیں چاہئے کہ ہم اس کو اپنی انا کا مسئلہ نہ بنائیں جو بھی اختلافات ہیں اس کو بات چیت کے ذریعہ دور کرنے کی کوشش کریں۔
آپ کو بتادیں کہ آج کے مجلس عاملہ کے اجلاس سے پہلے بھی صولت لائبریری کی دو سے تین عدد میٹنگز منعقد ہوچکی ہیں لیکن اراکین کے درمیان زبردست اختلافات پیدا ہونے کی وجہ سے وہ بے نتیجہ ہی رہیں۔ اس لئے اب دیکھنے والی بات یہ ہوگی کہ آج کا یہ اجلاس کتنا کارآمد ثابت ہوگا۔
