ارریہ سے آر جے ڈی کے امیدوار و سابق رکن پارلیمان سرفراز عالم کو بی جے پی کے امیدوار پردیپ کمار سنگھ نے ایک لاکھ 37 ہزار کے بڑے فرق سے ہرایا، جو ارریہ کی تاریخ میں سب سے بڑی جیت درج کی ہے۔
اس سے قبل پردیپ کمار سنگھ لگاتار دو بار شکست کھانے کے بعد تیسری بار انتخابی میدان میں اترے تھے جہاں انہوں نے فتح حاصل کی۔ جب پردیپ کمار سنگھ کے ٹکٹ کا اعلان ہوا تھا تب ایسا مانا جا رہا تھا کہ سرفراز عالم کے لئے راہ آسان ہوگئی مگر یہاں داؤ الٹا پڑ گیا۔
اپنی سیٹ گنوانے کے بعد سرفراز عالم نے ای ٹی وی بھارت سے خصوصی بات کرتے ہوئے اپنی شکست کو کھلے دل سے قبول کیا مگر انہوں نے اس الیکشن میں ضلع انتظامیہ کی کارکردگی پر سوال بھی کھڑا کیا۔
سرفراز عالم نے کہا کہ یہ پردیپ کمار سنگھ کی جیت نہیں بلکہ ضلع انتظامیہ کی جیت ہے، کیونکہ ووٹنگ کے دن کئی طرح کی شکایات موصول ہوئیں۔ انہوں نے کہا کہ ووٹنگ میں شفافیت نہیں برتی گئی لہذا بی جے پی کے امیدواروں کو فائدہ پہنچانے کے لئے ضلع انتظامیہ نے کام کیا۔ انہوں نے کہا یہ ہار ہماری نہیں بلکہ سیکولرزم کی ہار اور فرقہ پرست طاقتوں کی جیت ہے۔
سرفراز عالم نے کہا کہ میرے ہارنے سے میرے ذریعہ سماجی کاموں پر کوئی اثر نہیں پڑے گا، میں جیسے گذشتہ کل عوام کے درمیان تھا ویسے آئندہ کل بھی اسی سماج کے درمیان رہ کر لوگوں کی خدمت کروں گا۔
