سیمسنگ الیکٹرانکس کمپنی نے آج نوئیڈا کے چیف میڈیکل افسر کو 30 آکسیجن کنسنٹریٹر مہیا کرایا ہے۔ یہ آکسیجن کنسٹریٹر اس کووڈ-19 مدد کی پہلی کھیپ ہے۔ اسے سیمسنگ نے سی ایس آر (کارپوریٹ سوشل ریسپانسبلیٹی) کے ایک حصے کے طور پر اترپردیش کے لیے اعلان کیا ہے۔
ان آکسیجن کنسٹریٹر کو ہوائی جہاز کے ذریعہ جنوبی کوریا سے لایا گیا ہے۔ اس کے بعد آکسیجن سلنڈر اور لو ڈیڈ اسپیس (ایل ڈی ایس) سرنجیں بھی فراہم کی جائیں گی۔
ایل ڈی ایس سرنج شیشی میں ویکسین کے ہونے والے ضیاع کو روکنے میں مدد کرے گی۔ ایل ڈی ایس سرنج کے استعمال سے بیس فیصد تک زیادہ لوگوں کو ٹیکہ لگایا جا سکتا ہے۔ آکسیجن کے 30 کنسٹریٹر کا ایک اور بیچ آج لکھنؤ انتظامیہ کے حوالے کیا جارہا ہے۔
سیمسنگ انڈیا کے نائب صدر اور سی ایس آر ہیڈ مسٹر پارتھا گھوش نے کہا کہ سیمسنگ نوئیڈا، اتر پردیش اور ہندوستان کے دیگر لوگوں کے ساتھ کھڑا ہے اور اس مشکل وقت میں لوگوں کی مدد کرتا رہے گا۔
اس کے علاوہ سیمسنگ نے کووڈ راحتی اقدامات کے لئے یوپی اسٹیٹ ڈیزاسٹر منیجمنٹ فنڈ میں 7.5 کروڑ روپئے کا تعاون کیا ہے اور انہوں نے اتر پردیش میں 1900 آکسیجن سلنڈر ، 60 آکسیجن کنسٹریٹر اور 6.5 لاکھ ایل ڈی ایس سرنج عطیہ کرنے کا عہد کیا ہے۔
سیمسنگ نے نوئیڈا میں دنیا کی سب سے بڑی موبائل فیکٹری قائم کی ہے۔ یہ ریاست کے بڑے سرمایہ کاروں میں سے ایک ہے اور اس نے ضلع گوتم بدھ نگر ، نوئیڈا اور اتر پردیش کے ہزاروں لوگوں کو روزگار فراہم کیا ہے۔ ڈسٹرکٹ مجسٹریٹ سہاس ایل وائی نے سیمسنگ الیکٹرانکس کمپنی کے نمائندوں کا ان کی کاوش کا شکریہ ادا کیا اور امید ظاہر کی کہ کمپنی اسی طرح کورونا وبا میں حمایت جاری رکھے گی۔
