بی جے پی حکومت کے خلاف سماج وادی پارٹی کا احتجاج

ریاست اترپردیش کے ضلع سہارنپور میں سماج وادی پارٹی کے کارکنان نےاحتجاجی جلوس نکال کر بی جے پی حکومت کے خلاف اپنے غم و غصہ کا اظہار کیا۔

پارٹی کارکنان نے حقیقت نگر سے ضلع کلکٹریٹ تک جلوس نکالا۔

سماج وادی پارٹی کارکنان نے صدر جمہوریہ ہند کے نام مختلف مسائل کو لے کر ایک میمورنڈم ضلع مجسٹریٹ کے ذریعہ بھیجا۔

پارٹی کارکنان نے کہا کہ اس وقت ملک میں بی جے پی حکومت کی جانب سے کی جارہی تانا شاہی اب برداشت نہیں کی جائے گی۔

انہو ں نے کہا کہ جب سے مرکز اور ریاست میں بی جے پی اقتدار میں آئی ہے، اس وقت سے نوجوان، کسان، پسماندہ طبقہ، دلت اور چھوٹے تاجر سمیت مزدو ر وخواتین کے ساتھ برابر ناانصافی اور ان پر ظلم ہورہا ہے۔

تقریباً 6ماہ سے ریاست میں کووڈ 19کو لے کر اعلان شدہ لاک ڈاؤن ہے۔

اسکول نہیں کھل پارہے ہیں اور طلبہ وطالبات کے ساتھ فیس کے نام پر والدین کے ساتھ کھلی لوٹ کی جارہی ہے اور بڑے تعلیمی اداروں کو فائدہ پہنچانے کا کام کیا جارہا ہے۔

اسی سلسلے میں آج صدر جمہوریہ کے نام ضلع مجسٹریٹ کی معرفت ارسال کیا گیا۔

اس دوران سماج وادی پارٹی کارکنان نے ریاستی و مرکزی حکومت مخالف نعرے بھی لگائے۔