کانپور: اتر پردیش کے ضلع کانپور کی سیسامئو اسمبلی حلقہ سماجوادی پارٹی کے رکن اسمبلی عرفان سولنکی اور ان کے بھائی رضوان سولنکی نے کانپور کمشنر کیمپ آفس کے سامنے خودسپردگی کی ہے۔ اس دوران رکن اسمبلی حسن رومی، امیتابھ باجپئی اور ان کی اہلیہ بھی موجود تھیں۔ قیاس آرائیاں کی جارہی ہیں کہ عرفان سولنکی نے قرقی کی کارروائی سے بچنے کے لیے خودسپردگی کی ہے۔ Samajwadi Party MLA Irfan Solanki
دراصل ایم ایل اے عرفان سولنکی اور ان کے بھائی رضوان سولنکی پر حال ہی میں ایک بزرگ خاتون نے ان کے گھر پر زبردستی قبضہ کرنے اور گھر کو جلانے کا الزام لگایا تھا، جس کے بعد پولیس نے دونوں کے خلاف مقدمہ درج کرکے کارروائی شروع کردی۔ تاہم اس کے بعد سے عرفان سولنکی اور رضوان سولنکی فرار تھے۔ پولیس نے ان کی گرفتاری کے لیے 10 ٹیمیں تشکیل دی تھیں جو مختلف مقامات پر چھاپے مار رہی تھیں۔
اس کے ساتھ ہی ایم ایل اے نے عدالت میں پیشگی ضمانت کی درخواست بھی دائر کی تھی جس کی سماعت 5 دسمبر کو ہونی تھی لیکن اس سے پہلے جمعہ کو عرفان پولیس کمشنر کانپور بی پی جوگ دنڈ کے پاس خودسپردگی کے لیے پہنچ گئے ہیں۔ عرفان پر جعلی دستاویزات بنا کر ہوائی سفر کرنے کا بھی الزام ہے، جس پر پولیس دیگر دفعات کے تحت مقدمہ درج کر سکتی ہے۔ تاہم پولیس کی جانب سے دائر کی گئی پیشگی ضمانت کی درخواست کے پیش نظر کیس ڈائری عدالت میں پیش کی جا چکی ہے۔
